ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം മൂന്ന് കോടി തൊണ്ണൂറ്റിയഞ്ച് ലക്ഷം പിന്നിട്ടു. ഇതുവരെ 3,95,65,948 പേർക്കാണ് വൈറസ് ബാധ സ്ഥിരീകരിച്ചത്. മരണസംഖ്യ 11,08,617 ആയി ഉയർന്നു. 2,96,48,639 പേർ രോഗമുക്തി നേടി എന്നത് ആശ്വാസം നൽകുന്നു.

ഏറ്റവും കൂടുതൽ രോഗികളുള്ള ആമേരിക്കയിൽ ഇതുവരെ 82 ലക്ഷത്തിലധികം പേർക്കാണ് കൊവിഡ് സ്ഥിരീകരിച്ചത്. 2,23,644 പേർ മരിച്ചു. രോഗമുക്തി നേടിയവരുടെ എണ്ണം 53 ലക്ഷം പിന്നിട്ടു. ഇതുവരെ 53,95,398 പേരാണ് സുഖംപ്രാപിച്ചത്.

ഇന്ത്യയിൽ ഇതുവരെ 73 ലക്ഷത്തിലധികം പേർക്കാണ് കൊവിഡ് സ്ഥിരീകരിച്ചത്. കഴിഞ്ഞ ദിവസം 63,371 പേർക്കായിരുന്നു പുതുതായി വൈറസ് ബാധ സ്ഥിരീകരിച്ചത്. മരണസംഖ്യ 1.12 ലക്ഷം പിന്നിട്ടു. 64 ലക്ഷത്തിലധികം പേർ ഇതുവരെ രോഗമുക്തി നേടി.

ബ്രസീലിലും സ്ഥിതി ഗുരുതരമായി തുടരുകയാണ്. ഇതുവരെ 52 ലക്ഷത്തിലധികം പേർക്കാണ് രാജ്യത്ത് രോഗബാധ സ്ഥിരീകരിച്ചത്. 1,53,229 പേർ മരിച്ചു. 46,19,560 പേർ രോഗമുക്തി നേടി. വൈറസ് വ്യാപനം നിയന്ത്രണവിധേയമായിരുന്ന ഇറ്റലിയിൽ വീണ്ടും രോഗവ്യാപനം രൂക്ഷമാകുകയാണ്. രാജ്യത്ത് കഴിഞ്ഞദിവസം പതിനായിരത്തിലേറെ ആളുകൾക്കാണ് കൊവിഡ് സ്ഥിരീകരിച്ചത്. ആകെ രോഗബാധിതരുടെ എണ്ണം 3,91,611ആയി. മുപ്പത്തിയാറായിരത്തിലധികം പേർ മരിച്ചു.

കൊവിഡ് വ്യാപനം രൂക്ഷമായിക്കൊണ്ടിരിക്കെ ലോക വ്യാപകമായി തിരക്കിട്ട വാക്സിൻ പരീക്ഷണങ്ങൾ നടക്കുകയാണ്. തങ്ങൾ നടത്തിയ വാക്സിൻ പരീക്ഷണം പോസിറ്റീഫ് ഫലം കാണിച്ചുവെന്ന് ചൈനയിലെ മുഖ്യ വാക്സിൻ നിർമ്മാതാക്കളായ ചൈന നാഷണൽ ബയോടെക് ഗ്രൂപ്പ് വ്യക്തമാക്കി. പരീക്ഷണം നടത്തിയവരിൽ രോഗ പ്രതിരോധ ശേഷി വർദ്ധിച്ചതായാണ് കണ്ടെത്തൽ. വാക്സിൻ സുരക്ഷിതമാണെന്ന് ഗവേഷകർ പറഞ്ഞു. ബി.ബി.ഐ.ബി.പി-കോർവ് എന്നാണ് വാക്സിന് പേര് നൽകിയിരിക്കുന്നത്.