വെല്ലിംഗ്ടൺ: ന്യൂസിലാൻഡ് എം.പിയായി തിരഞ്ഞെടുക്കപ്പെട്ട് ഹിമാചൽപ്രദേശ്​ സ്വദേശിയും. ഹാമിൽട്ടൺ വെസ്​റ്റിൽ നിന്നാണ്​ ഹിമാചൽപ്രദേശ്​ സ്വദേശിയായ 33 കാരൻ ഗൗരവ്​ ശർമ്മ ലേബർ പാർട്ടി എം.പിയായി പാർലമെന്റിലെത്തിയിരിക്കുന്നത്.

നാഷണൽ പാർട്ടിയിലെ ടിം മാഷിനോഡിനെ 4,425 വോട്ടുകൾക്കാണ്​ അദ്ദേഹം പരാജയപ്പെടുത്തിയത്​. 16,950 വോട്ടുകളാണ്​ ​ആകെ പോൾ ചെയ്​തത്​. അതേസമയം, ന്യൂസിലാൻഡിൽ എം.പിയായി തെരഞ്ഞെടുക്കപ്പെട്ട ഗൗരവിനെ ഹിമാചൽ മുഖ്യമന്ത്രി ജയ്​ റാം താക്കൂർ അഭിനന്ദിച്ചു. ഗൗരവിന്റെ നേട്ടത്തിൽ ഹിമാചലും ഇന്ത്യയും അഭിമാനിക്കുന്നുവെന്ന്​ അദ്ദേഹം പറഞ്ഞു.

20 വർഷം മുമ്പാണ്​ ഡോക്​ടറായ ഗൗരവ്​ ഹിമാചലിൽഎത്തുന്നത്​. ഹാമിൽട്ടണിലാണ്​ അദ്ദേഹം ജോലി നോക്കിയിരുന്നത്​. മെഡിസിനിൽ ബിരുദം പൂർത്തിയാക്കിയ അദ്ദേഹം ബിസിനസ്​ അഡ്​മിനിസ്​ട്രേഷനിൽ ബിരുദാനന്തര ബിരുദവും നേടിയിട്ടുണ്ട്​. കൊവിഡ്​ സമയത്ത്​ ഹാമിൽട്ടണിലെ ജനങ്ങൾക്കിടയിൽ കാര്യക്ഷമമായി അദ്ദേഹം പ്രവർത്തിച്ചിരുന്നതായി ലേബർ പാർട്ടി അവകാശപ്പെടുന്നു. ഗൗരവ്​ ഒമ്പതാം ക്ലാസിൽ പഠിക്കുമ്പോഴാണ്​ ഹിമാചൽ പ്രദേശിലെ ഇലക്​ട്രിസിറ്റി ബോർഡിലെ ജോലി രാജിവെച്ച്​ അദ്ദേഹത്തിന്റെ പിതാവ് കുടുംബസഹിതം ന്യൂസിലാൻഡിൽ എത്തുന്നത്.

അതേസമയം,മൂന്നാഴ്​ചക്കുള്ളിൽ സർക്കാർ രൂപവത്​കരിക്കാൻ സാധിക്കുമെന്നാണ്​ പ്രതീക്ഷയെന്ന്​ ന്യൂസിലൻഡ്​ പ്രധാനമന്ത്രി ജസീന്ത ആർഡേൻ പറഞ്ഞു.