വാഷിംഗ്ടൺ: അമേരിക്കൻ പ്രസിഡന്റ് ഡൊണൾഡ്​ ട്രംപിന്​ ചൈനയിൽ നിക്ഷേപമിറക്കാനുള്ള പദ്ധതിയുണ്ടായിരുന്നുവെന്നും ചൈനയിൽ അദ്ദേഹത്തിന്​ ബാങ്ക്​ അക്കൗണ്ടുണ്ടെന്നും വെളിപ്പെടുത്തി ന്യൂയോർക്ക്​ ടൈംസ്​. ചൈന കൂടാതെ ബ്രിട്ടൻ, അയർലാൻഡ്​ എന്നിവിടങ്ങളിലും ബാങ്ക് അക്കൗണ്ടുകളുണ്ടെന്നും റിപ്പോർട്ടിലുണ്ട്.

കൊവിഡ്​ രാജ്യത്ത്​ ശക്തിപ്രാപിച്ചതിന്​ പിന്നാലെ നിരന്തരം ചൈനക്കെതിരെ ആരോപണങ്ങളും നടപടികളുമായി ട്രംപ്​ രംഗത്തെത്തിയിരുന്നു. എതിർ സ്ഥാനാർത്ഥി ജോ ബൈഡന്​ ചൈനയോട്​ മൃദു സമീപനമാണെന്നും അദ്ദേഹം പ്രചാരണങ്ങളിൽ ആവർത്തിച്ചു.

ചൈനയിൽ അടക്കം പല വിദേശരാജ്യങ്ങളിലും ആഡംബര ഹോട്ടൽ ശൃംഖലകളുള്ളയാളാണ്​ ട്രംപ്​. 2012 മുതൽ ട്രംപിന്റെ ചൈനീസ് അക്കൗണ്ട് നിയന്ത്രിച്ചിരുന്ന ഷാങ്​ഹായിലുള്ള ട്രംപ് ഇന്റർനാഷണൽ ഹോട്ടൽസ് മാനേജ്‌മെന്റ് എൽ.എൽ.സി എന്ന സ്ഥാപനത്തിന്റെ അക്കൗണ്ടിൽ നിന്ന്​ 2013നും 2015നും ഇടയിൽ 1.8 ലക്ഷം യു.എസ്​ ഡോളർ നികുതിയായി മാത്രം ചൈനയിൽ അടച്ചിട്ടുണ്ടെന്നാണ്​ റിപ്പോർട്ട്​.

അതേസമയം, പ്രാദേശിക നികുതികൾ അടയ്ക്കാൻ വേണ്ടിയാണ് ചൈനയിൽ ട്രംപ് ഓർഗനൈസേഷൻ ബാങ്ക് അക്കൗണ്ട് ആരംഭിച്ചതെന്ന്​ കമ്പനി വക്താവ് അലൻ ഗാർടൻ വെളിപ്പെടുത്തി. 2015 ഓടു കൂടി പദ്ധതി നടപ്പിലാകാതെ വന്നതോടെ ബാങ്ക് അക്കൗണ്ട് നിർജീവമായി. ഏതു ബാങ്കിലാണ് അക്കൗണ്ട് ഉള്ളത് എന്ന് അദ്ദേഹം വെളിപ്പെടുത്തിയില്ല.