 ഭർത്താവ് വിഷം ഉള്ളിൽച്ചെന്ന് ആശുപത്രിയിൽ

പത്തനാപുരം: നവവധുവിനെ ഭർത്താവിന്റെ വീട്ടിൽ തൂങ്ങി മരിച്ച നിലയിൽ കണ്ടെത്തി. ഭർത്താവിനെ വിഷം ഉള്ളിൽച്ചെന്ന് അവശ നിലയിൽ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. കുന്നിക്കോട് കിണറ്റിൻകര കൈലാസത്ത് മേലേതിൽ സുജിത്തിന്റെ ഭാര്യ ദേവുവാണ് (22) മരിച്ചത്. ഇന്നലെ വൈകിട്ടാണ് സംഭവം. കിണറ്റിൻകര ജംഗ്ഷനിൽ സുജിത്ത് അവശനിലയിൽ കിടക്കുന്ന വിവരം വീട്ടിൽ അറിയിക്കാനെത്തിയ നാട്ടുകാരാണ് ദേവുവിനെ തൂങ്ങി മരിച്ച നിലയിൽ കണ്ടത്.
സുജിത്തിന്റെ വീട്ടിൽ അമ്മ ഓമന മാത്രമാണുള്ളത്. സംഭവ സമയം ഇവർ തൊഴിലുറപ്പ് ജോലിക്ക് പോയിരിക്കുകയായിരുന്നു. അഞ്ചൽ മാവിള സ്വദേശിനിയായ ദേവുവിനെ സുജിത്ത് നാലുമാസം മുൻപാണ് വിവാഹം കഴിച്ചത്. പ്രണയവിവാഹമായിരുന്നു. ജൂണിൽ ദേവുവിനെ കാണാനില്ലെന്ന് കാട്ടി ബന്ധുക്കൾ അഞ്ചൽ പൊലീസിൽ പരാതി നൽകിയിരുന്നു. ഇതിനെതുടർന്ന് ഇരുവരെയും കണ്ടെത്തിയെങ്കിലും ദേവു സുജിത്തിനൊപ്പം പോവുകയായിരുന്നു. കുന്നിക്കോട് പൊലീസ് സ്ഥലത്തെത്തി മേൽനടപടി സ്വീകരിച്ചു.