വാഷിംഗ്ടൺ: ശിവ പാർവതിമാർ ഒന്നായി ലയിച്ചാണ് അർദ്ധനാരീശ്വരനാകുന്നത്. ഇപ്പോഴിതാ അങ്ങ് അമേരിക്കയിലെ പവർ‌മിൽ നേച്ചർ റിസർവിലെ കാർനെഗി മ്യൂസിയം ഒഫ് നാച്ചുറൽ ഹിസ്റ്ററി പാതി ശരീരം ആണിന്റേതും പാതി പെണ്ണിന്റേതുമായ ഒരു പക്ഷിയെ കണ്ടെത്തിയിരിക്കുകയാണ്. ഒന്നര പതിറ്റാണ്ടുകൾക്ക് ശേഷമാണ് ഇവിടെ ഇത്തരത്തിലൊരു പക്ഷിയെ കണ്ടെത്തുന്നത്. "സംഘത്തിലുള്ള എല്ലാവരും വളരെയധികം വളരെ ആവേശത്തിലാണ്. വളരെ അപൂർവമായ ഒന്ന് കണ്ടെത്തിയതിന്റെ സന്തോഷം എല്ലാവർക്കുമുണ്ട്. കാർനെഗി മ്യൂസിയം ഒഫ് നാച്ചുറൽ പ്രോഗ്രാം മാനേജർ ആനി ലിൻഡ്സെ പറഞ്ഞു.

ബൈലാറ്ററൽ ഗൈനാൻ‌ഡ്രോമോർഫിസം

പക്ഷിയുടെ ജനിതക മാറ്റം എങ്ങനെ സംഭവിച്ചുവെന്നുള്ളത് കണ്ടെത്താൻ പഠനം നടത്തുമെന്ന് ഗവേഷകർ പറഞ്ഞു. ബൈലാറ്ററൽ ഗൈനാൻ‌ഡ്രോമോർഫിസം എന്നാണ് ഈ ജനിതക വ്യതിയാനത്തിന് പറയുന്നത്. പക്ഷികളുടെ മുട്ടയിലുണ്ടാകുന്ന ജനിതക മാറ്റമാണ് ഇത്തരമൊരു അവസ്ഥയ്ക്ക് കാരണമാകുന്നത്. പുരുഷ-സ്ത്രീ കോശങ്ങൾ ഒരു ഭ്രൂണത്തിന് രൂപം നൽകുന്നതാണ് ഇതിനു കാരണം. പക്ഷിയുടെ ശരീരത്തിൽ നിന്നും ശേഖരിച്ച തൂവൽ ഉപയോഗിച്ച് ഈ ജനിതക മാറ്റം എങ്ങനെ സംഭവിച്ചുവെന്ന് കണ്ടെത്താൻ സാധിക്കുമെന്ന് ലിൻഡ്സെ പറഞ്ഞു.പത്ത് ലക്ഷത്തിൽ ഒന്ന് എന്ന നിലയ്ക്കാണ് ഇത്തരത്തിലുള്ള പക്ഷികളെ കാണാറുള്ളത്. അതിനാൽ തിരിച്ചറിയപ്പെടാനും ബുദ്ധിമുട്ടാണ്. ഇതുവരെ ഇത്തരത്തിലുള്ള അഞ്ച് പക്ഷികളെയാണ് കണ്ടെത്തിയിട്ടുണ്ട്.

 റോസ് ബ്രെസ്റ്റഡ് ഗ്രോസ്ബീക്ക്