സ്ത്രീക്ക് സൗന്ദര്യം ആവശ്യമെന്നു ചിന്തിക്കുന്നവർ പുരുഷന് അതാവശ്യമില്ലെന്ന് കരുതുന്ന മനോഭാവത്തെക്കുറിച്ച് ഡോകട്ർ ഷിനു ശ്യാമളൻ. സ്ത്രീയുടെ സൗന്ദര്യത്തിന് വില നൽകുന്നവർ അതേ വില പുരുഷന്റെ സൗന്ദര്യത്തിനും നൽകണമെന്നാണ് തന്റെ ഫേസ്ബുക്ക് പോസ്റ്റ് വഴി ഡോക്ടർ നിലപാടെടുക്കുന്നത്. അതേസമയം എല്ലാവരുടെയും മനസിനും നമ്മൾ വില നൽകേണ്ടതാണെന്നും തനിക്കുണ്ടായ ഒരു അനുഭവം വിശദീകരിച്ചുകൊണ്ട് ഷിനു പറയുന്നു.

ഫേസ്ബുക്ക് പോസ്റ്റ് ചുവടെ:

'ഒരു പെൺകുട്ടി നെറ്റി മുറിഞ്ഞു വന്നു. അന്ന് ഡ്യൂട്ടിയിൽ ഉണ്ടായിരുന്ന ഡോക്ടർ മുറിവ് തുന്നി. അപ്പോൾ രക്ഷകർത്താക്കൾ അൽപ്പം ബഹളം വെച്ചിട്ട് പ്ളാസ്റ്റിക് സർജനെ കൊണ്ട് തുന്നണം എന്നു പറഞ്ഞു. നെറ്റിയിൽ പാട് വരരുതല്ലോ. വളരെ മുതിർന്ന ഒരു ഡോക്ടർ ആയിരുന്നു. 45 വർഷത്തിന് മുകളിൽ ജോലി പരിചയമുള്ള ഡോക്ടർ. ആ ഡോക്ടറിന്റെ കണ്ണ് നിറഞ്ഞു.

ഈ സംഭവത്തിന് ശേഷം ആര് വന്നാലും സ്‌കാർ പാടില്ലാതെ തുന്നണമെങ്കിൽ പ്ളാസ്റ്റിക് സർജനെ വിളിക്കാം എന്നു രോഗികളോട് മുന്നേ പറയും. മിക്ക പെൺകുട്ടികളുടെയും രക്ഷക്കാർത്താക്കൾ മുഖത്തെ സൗന്ദര്യത്തെ ബാധിക്കുമെന്ന് കരുതി പ്ളാസ്റ്റിക് സർജനെ വിളിപ്പിക്കും.

പക്ഷെ ആൺകുട്ടികളുടെ രക്ഷകർത്താക്കളിൽ ഏറെയും പാടൊന്നും കുഴപ്പമില്ല എന്നും സാധാരണ രീതിയിൽ തുന്നിയ മതിയെന്നും പറയാറുണ്ട്.

അങ്ങനെ ഒരു ആൺകുട്ടി മുറിവ് പറ്റി വന്നു. നെറ്റിയിൽ പാട് വരുന്ന വിധം മുറിവ് ഉണ്ട്. തുന്നൽ ആവശ്യമാണ്. ഞാനവരോട് കാര്യങ്ങൾ പറഞ്ഞു. പക്ഷെ അവർ ആൺകുട്ടിയല്ലേ പാട് സാരമില്ല എന്നു പറഞ്ഞു സാധാരണ രീതിയിൽ തുന്നി.

ആൺകുട്ടിയായാലും പെണ്കുട്ടിയായാലും മുഖത്തു പാട് വന്നാൽ അത് പാട് തന്നെയല്ലേ. ആരുടെ മുഖത്തു പാട് വന്നാലും വിഷയമല്ല എന്ന് വേണമെങ്കിൽ ചിന്തിക്കാം.

ബാഹ്യ സൗന്ദര്യത്തിന് സ്ത്രീയുടേതിന് മാത്രം പ്രാധാന്യം കൊടുക്കേണ്ട കാര്യമില്ല. പ്രാധാന്യം വേണമെങ്കിൽ രണ്ടു പേരുടെയും ബാഹ്യ സൗന്ദര്യത്തിന് ഒരേ വില കൊടുക്കുക. അവരുടെ മനസിന്റെ സൗന്ദര്യത്തിന് വില കൊടുക്കുക.'