അറ്റ്​ലാന്റ: അമേരിക്കൻ പ്രസിഡന്റ് തിരഞ്ഞെടുപ്പ് ബാലറ്റിലേക്ക് ബഹിരാകാശത്ത് നിന്നൊരു വോട്ടെത്തി. നാസയുടെ ബഹിരാകാശ യാത്രിക കേറ്റ്​ റൂബിൻസാണ് കഴിഞ്ഞയാഴ്​ച സ്​​പേസ്​

സ്​റ്റേഷനിൽ വച്ച്​ ​വോട്ട് രേഖപ്പെടുത്തിയത്.

രാജ്യാന്തര ബഹിരാകാശ കേന്ദ്രത്തിൽ നിന്ന്​ ഞാൻ വോട്ട്​ ചെയ്​തു -കേറ്റ്​ റൂബിൻസ്​' എന്ന അടിക്കുറിപ്പോടെ ഒക്​ടോബർ 22ന്​ കേറ്റ്​ റൂബിൻസിന്റെ ചിത്രം നാസ ട്വിറ്ററിൽ പങ്കുവെച്ചു.​

ഐ.എസ്​.എസ്​ വോട്ടിംഗ് ബൂത്തിന്​ മുന്നിൽ നിൽക്കുന്ന കേറ്റിന്റെ ചിത്രവും നാസ പങ്കുവച്ചു. 'എല്ലാവരും വോട്ട്​ ​ചെയ്യേണ്ടത്​ വളരെ പ്രധാനമാണെന്ന്​ ഞാൻ കരുതുന്നു. ബഹിരാകാശത്തുനിന്ന്​ ഞങ്ങൾക്കത്​ ചെയ്യാനാകുമെങ്കിൽ ഭൂമിയിൽ നിന്ന്​ നിങ്ങൾക്ക്​ വോട്ട്​ ​ചെയ്യാനാകുമെന്ന്​ ഞാൻ വിശ്വസിക്കുന്നു' - വോട്ടിംഗിനെക്കുറിച്ച് കേറ്റ് സംസാരിക്കുന്ന വീഡിയോയും നാസ പങ്കുവച്ചിട്ടുണ്ട്.

ഒക്​ടോബർ 14നാണ്​ കേറ്റ്​ റൂബിൻസും രണ്ട്​ റഷ്യൻ ക്രൂമേറ്റ്​സും ബഹിരാകാശത്ത്​ താമസിക്കാനായി യാത്ര പുറപ്പെട്ടത്. ലേസർ കൂൾഡ്​ ആറ്റങ്ങളുടെ ഉപയോഗം സംബന്ധിച്ച്​ പഠിക്കാനായിരുന്നു കേറ്റിന്റെ യാത്ര. ആദ്യമായല്ല കേറ്റ് ബഹിരാകാശത്ത് നിന്ന് വോട്ട്​ രേഖ​പ്പെടുത്തുന്നത്​. 2016ലെ തെരഞ്ഞെടുപ്പിൽ കേറ്റ്​ വോട്ട്​ രേഖപ്പെടുത്തിയതും ബഹിരാകാശത്തുനിന്ന്​ തന്നെയായിരുന്നു.

 വോട്ടിംഗ് ഇപ്രകാരം

ടെക്സാസിൽ നിന്ന് വോട്ടവകാശം നേടിയ ബഹിരാകാശ യാത്രികർക്ക് സ്പേസിൽ നിന്ന് വോട്ട് ചെയ്യാൻ സാധിക്കും. ഇവർക്ക്​ ബഹിരാകാശത്തുനിന്ന്​ ഇലക്​ട്രോണിക്​ ബാലറ്റ്​ വഴി വോട്ട്​ രേഖപ്പെടുത്താൻ ടെക്​സാസിലെ നിയമം അനുശാസിക്കുന്നുണ്ട്​. മിഷൻ കൺട്രോൾ ഇലക്​ട്രോണിക്​ ബാലറ്റ്​ ബഹിരാകാശത്തേക്ക്​ അയക്കുകയും അവിടെനിന്ന്​ വോട്ട്​ രേഖപ്പെടുത്തി തിരിച്ചയക്കുകയുമാണ്​ ചെയ്യുക. ബഹിരാകാശ യാത്രികൻ വോട്ട്​ രേഖപ്പെടുത്തിയതിന്​ ശേഷം ക്ലാർക്ക്​ ഒാഫിസിലേക്ക്​ ഇ - മെയിൽ വഴി അയച്ചുനൽകും. ഇതോടെ ബഹിരാകാശ യാത്രികന്റെ വോട്ട്​ അധികൃതർ ഒൗദ്യോഗികമായി രേഖപ്പെടുത്തുകയും ചെയ്യും.