ലണ്ടൻ: യു.എൻ അണുവായുധ നിരോധന കരാർ പ്രാബല്യത്തിൽ. 50ാം രാജ്യവും ഒപ്പുവച്ചതോടെയാണിത്. അംഗീകരിക്കപ്പെട്ട അഞ്ച്​ ആണവ ശക്​തികളായ യു.എസ്​, റഷ്യ, ചൈന, യു.കെ, ഫ്രാൻസ്​ എന്നീ രാജ്യങ്ങൾ ഒപ്പുവെക്കാതെ വിട്ടുനിൽക്കുന്നതിനാൽ പ്രായോഗികമായി വിജയമെന്നു പറയാനാവില്ലെങ്കിലും കരാർ നിലവിൽ വന്നത്​ ചരിത്രപിറവിയാണെന്ന്​ അണുവായുധങ്ങൾക്കെതിരെ നിലകൊള്ളുന്നവ‌ർ പറയുന്നത്. ഹോണ്ടുറസാണ്​ 50ാമതായി കരാറിൽ ഒപ്പുവെച്ചത്​. 50ാമത്തെ രാജ്യം ഒപ്പുവെക്കുന്നതോടെ കരാർ നിയമമാകുമെന്നാണ്​ നേരത്തേയുള്ള വ്യവസ്ഥ. 2017​ൽ യു.എൻ പൊതുസഭ കൊണ്ടുവന്ന കരാർ 122 രാജ്യങ്ങൾ അംഗീകരിച്ചിട്ടുണ്ടെങ്കിലും പലരും ഒപ്പുവെക്കാൻ തയാറായിട്ടില്ല. അണുവായുധങ്ങൾ ലോകത്തുനിന്ന്​ തുടച്ചുനീക്കുന്നതിൽ നിർണായക ചുവടുവെപ്പാണ്​ നിയമമെന്ന്​ യു.എൻ സെക്രട്ടറി ജനറൽ അന്റോണിയോ ഗു​​ട്ടെറസ്​ പറഞ്ഞു.