വാഷിംഗ്ടൺ​: 2020ൽ തന്നെ കൊവിഡ്​ വാക്​സിൻ നൽകാമെന്ന​ ശുഭാപ്​തി വിശ്വാസം പ്രകടിപ്പിച്ച്​ ഫാർമസ്യൂട്ടിക്കൽ കമ്പനിയായ ഫിസർ. ക്ലിനിക്കൽ പരിശോധന തുടരുകയും വാക്​സിന്​ അനുമതി ലഭിക്കുകയും ചെയ്​താൽ ഇൗ വർഷം തന്നെ 40 മില്ല്യൺ ഡോസ്​ വാക്​സിൻ അമേകരിക്കയിൽ വിതരണം ചെയ്യാനാകും. മാർച്ച്​ 2021 ഒാടെ 100 മില്ല്യൺ ഡോസ്​ മരുന്ന്​ വിതരണം ചെയ്യാനാകുമെന്നും ഫിസർ ചീഫ്​ എക്​സിക്യൂട്ടീവ്​ ആലബർട്ട്​ ബൗർല പറഞ്ഞു. അതേസമയം വാക്​സിന്റെ ഫലപ്രാപ്​തി വിലയിരുത്തുന്നതിൽ കമ്പനി ഇപ്പോഴും പ്രധാന ഘട്ടത്തിൽ എത്തിയിട്ടില്ലെന്നും അദ്ദേഹം കൂട്ടിച്ചേർത്തു. ഒന്നിലധികം വാക്​സിനുകൾ ഫിസർ നിർമിക്കുന്നുണ്ടെന്നാണ്​ നേരത്തേ പുറത്തുവന്ന വിവരം. ബയോഎൻടെക്​ എന്ന ജർമൻ കമ്പനിയുമായി ചേർന്നാണ്​ ഫിസറിന്റെ വാക്​സിൻ നിർമാണം. പ്രാഥമിക പരീക്ഷണങ്ങളിൽ വാക്​സിൻ ആന്റിബോഡി ഉൽപ്പാദിപ്പിക്കുന്നതിനലും പ്രതിരോധ ശേഷി വർദ്ധിപ്പിക്കുന്നതിലും വിജയകരമായിരുന്നു.