ന്യൂഡൽഹി: കഴിഞ്ഞ 24 മണിക്കൂറിനിടെ 48,648 പുതിയ കേസുകൾ റിപ്പോർട്ട് ചെയ്‌തതോടെ രാജ്യത്തെ ആകെ കൊവിഡ് രോഗികളുടെ എണ്ണം 81 ലക്ഷത്തോട് അടുക്കുന്നു. 80,88,851 പേർക്കാണ് ഇതുവരെ കൊവിഡ് സ്ഥിരീകരിച്ചത്. കഴിഞ്ഞ ദിവസം 563 പേർ കൂടെ മരണമടഞ്ഞതോടെ രാജ്യത്തെ കൊവിഡ് മരണനിരക്ക് 1,21,090 ആയി. കൊവിഡ് മുക്തി നേടിയവരുടെ എണ്ണം 74 ലക്ഷത്തോട് അടുക്കുകയാണ്. ആകെ 5,94,386 ആക്‌റ്റീവ് കേസുകളാണ് രാജ്യത്തുള‌ളത്. 73,73,375 പേർക്ക് രോഗം ഭേദമായി.

ജോൺ ഹോപ്‌കിൻസ് സർവകലാശാല നൽകുന്ന കണക്ക് പ്രകാരം രോഗം ഭേദമായവരുടെ എണ്ണത്തിൽ ഒന്നാമത് ഇന്ത്യയാണ്. ബ്രസീലും അമേരിക്കയുമാണ് തൊട്ടുപുറകിലുള‌ളത്. ലോകത്ത് കൊവിഡ് രൂക്ഷമായി ബാധിച്ച രണ്ടാമത് രാജ്യവും ഇന്ത്യയാണ്. പട്ടികയിൽ ഒന്നാമത് അമേരിക്കയും മൂന്നാമത് ബ്രസീലുമാണ്. ഇന്ത്യയിലെ കൊവിഡ് പോസി‌റ്റീവി‌റ്റി നിരക്ക് 7.54% ആണെന്ന് കേന്ദ്ര ആരോഗ്യ മന്ത്രാലയം അറിയിച്ചു. രാജ്യത്ത് കൊവിഡ് മരണനിരക്ക് 1.50% ആണ്. രോഗമുക്തി നിരക്ക് രാജ്യത്ത് 91.15% ആണെന്ന് കേന്ദ്ര ആരോഗ്യമന്ത്രാലയത്തിന്റെ റിപ്പോർട്ടിൽ പറയുന്നു.