കോഴിക്കോട്: ഗോകുലം കേരളം എഫ്.സി ഘാനക്കാരൻ സ്‌ട്രൈക്കർ ഡെന്നിസ് ആൻടവി ആഗയാരെയുമായി കരാറിൽ എത്തി. സ്വീഡൻ, നോർവേ, മലേഷ്യൻ ടോപ് ലീഗിലുകളിൽ കളിച്ച പരിചയവുമായിട്ടാണ് 27 കാരനായ ആൻടവി ഗോകുലത്തിലേക്ക് വരുന്നത്. ഘാനയിലെ അക്ക്ര സ്വദേശിയായ ആൻടവി, അയാക്സ് അക്കാഡമിയിലൂടെയാണ് കളി തുടങ്ങുന്നത്. ഘാനയിലെ അക്ക്ര ഹേർട്സ് ഓഫ് ഓകെ എന്ന ക്ലബിൽ ആയിരുന്നു അരങ്ങേറ്റം. പതിനെട്ടാം വയസിൽ മലേഷ്യൻ സൂപ്പർ ഡിവിഷൻ ക്ലബായ കേളന്റ്റാൺ എഫ്.സി ആൻടവിയെ സൈൻ ചെയ്തു. അരങ്ങേറ്റ സീസണിൽ തന്നെ മലേഷ്യൻ സൂപ്പർ ലീഗും മലേഷ്യൻ എഫ്.എ കപ്പ് ചാമ്പ്യനുമായ ആൻടവി, ക്ലബിനായി പത്തു കളികളിൽ നിന്നും നാലു ഗോളുകൾ നേടുകയും ചെയ്തു. പിന്നീട് പെറിലീസ് എന്ന മലേഷ്യൻ ക്ലബിനു വേണ്ടിയും കളിച്ചു. 2013 സീസണിൽ ഘാനയിൽ തിരിച്ചെത്തിയ ആൻടവി, ഇന്റർ അല്ലിയാസ് ക്ലബിനായും സ്വീഡനിലെ ഫസ്റ്റ് ഡിവിഷൻ ക്ലബായ റോസെൻഗാർഡ് 1917 നു വേണ്ടിയും ബൂട്ടണിഞ്ഞു. തുടർന്ന് നോർവേ ക്ലബായ എഫ് കെ ജേർവിലും കളിച്ചു.

"ഗോകുലം കേരള എഫ്.സിയിൽ കളിക്കുവാൻ കഴിയുന്നതിൽ അതിയായ സന്തോഷം ഉണ്ട്. ഈ പ്രാവശ്യം ഐ ലീഗ് കിരീടം നേടുവാൻ കഴിയുമെന്ന് ആശിക്കുന്നു.

ആൻടവി

"ഞങ്ങൾ ഐ ലീഗിന് വേണ്ടി ഒരു ചാമ്പ്യൻ ടീമിനെയാണ് ഒരുക്കുന്നത്. ആൻടവി യൂറോപ്പിൽ കളിച്ച പരിചയുവുമായിട്ടാണ് ഗോകുലത്തിലേക്കു വരുന്നത്,"

ഗോകുലം ഗോപാലൻ

ഗോകുലം കേരള എഫ്.സി ചെയർമാൻ