ന്യൂഡല്‍ഹി: തുടര്‍ച്ചയായി നാലാം വട്ടവും കേരളം ഭരണ നിര്‍വഹണത്തില്‍ ഒന്നാമത് എത്തിയതിന് പിന്നാലെ ബി.ജെ.പി ഭരിക്കുന്ന ഉത്തര്‍പ്രദേശിനെ പരിഹസിച്ച് മുതിര്‍ന്ന അഭിഭാഷകന്‍ പ്രശാന്ത് ഭൂഷണ്‍. 'മികച്ച ഭരണം കേരളത്തില്‍, മോശം ഉത്തര്‍പ്രദേശ്, രാമരാജ്യം VS യമരാജ്യം' - എന്നായിരുന്നു അദ്ദേഹത്തിന്റെ ട്വീറ്റ്.
ബംഗളൂരു ആസ്ഥാനമായ പബ്ലിക് അഫയേഴ്സ് ഇന്‍ഡക്സ് തയ്യാറാക്കിയ പട്ടികയില്‍ കേരളം ഒന്നാമത് എത്തിയതിന് പിന്നാലെയാണ് പ്രശാന്ത് ഭൂഷണ്‍ യു പിയെ പരിഹസിച്ച് രംഗത്ത് എത്തിയത്. കേരളത്തിന് പുറമെ, തമിഴ്നാട്, ആന്ധ്രാപ്രദേശ്, കര്‍ണാടക എന്നീ ദക്ഷിണേന്ത്യന്‍ സംസ്ഥാനങ്ങളാണ് ആദ്യ നാല് സ്ഥാനങ്ങളിലുള്ളത്.
പട്ടികയില്‍ ഏറ്റവും അവസാന സംസ്ഥാനം യോഗി ആദിത്യനാഥ് ഭരിക്കുന്ന ഉത്തര്‍പ്രദേശിനാണ്. നീതി, വളര്‍ച്ച, സുസ്ഥിരത എന്നീ മൂന്ന് ഘടകങ്ങളുടെ അടിസ്ഥാനത്തിലാണ് പബ്ലിക് അഫയേഴ്സ് സെന്റര്‍ ഭരണനിര്‍വഹണനിലവാരം വിശകലനം ചെയ്തത്. 2020ലെ പൊതുകാര്യ സൂചിക പ്രകാരമാണ് ഭരണ നിര്‍വഹണത്തില്‍ വലിയ സംസ്ഥാനങ്ങളുടെ വിഭാഗത്തില്‍ കേരളം ഒന്നാമതുള്ളത്. കേരളത്തിന് ലഭിച്ച നേട്ടത്തില്‍ മുഖ്യമന്ത്രി പിണറായി വിജയന്‍ ഫേസ്ബുക്കില്‍ കുറിച്ചിരുന്നു.
'കേരളം ഒരിക്കല്‍ കൂടി ഭരണമികവിനുള്ള അംഗീകാരത്തിന്റെ നിറവിലാണ്. ഇന്നു പുറത്തു വന്ന പബ്ലിക് അഫയേഴ്സ് ഇന്‍ഡക്സില്‍ രാജ്യത്തെ ഏറ്റവും മികച്ച ഭരണമുള്ള സംസ്ഥാനമായി കേരളത്തെ വീണ്ടും തെരഞ്ഞെടുത്തു. തുടര്‍ച്ചയായി നാലാം വട്ടമാണ് കേരളം ഈ നേട്ടം കൈവരിക്കുന്നത്' - എന്നും അദേഹം പറഞ്ഞു.
Kerala best-governed, Uttar Pradesh worst among large states, says Public Affairs Centre report.
Ram Raj Vs Yum Raj! https://t.co/ec3JLM17hm— Prashant Bhushan (@pbhushan1) October 31, 2020