പാലക്കാട്: സംസ്ഥാനത്തെ കുടുംബശ്രീ ഗ്രൂപ്പുകൾ നിർമ്മിക്കുന്ന വിവിധ ഉത്പന്നങ്ങൾ വീടുകളിലേക്ക് എത്തിക്കുന്ന ഹോംഷോപ്പ് പദ്ധതിക്ക് ജില്ലയിൽ തുടക്കമായി. ജില്ലാതല ഉദ്ഘാടനം കെ.ഡി.പ്രസേനൻ എം.എൽ.എ നിർവഹിച്ചു. കിഴക്കഞ്ചേരി പഞ്ചായത്ത് പ്രസിഡന്റ് കവിതാ മാധവൻ അധ്യക്ഷത വഹിച്ചു.

സംസ്ഥാന സർക്കാരിന്റെ നൂറുദിന പരിപാടിയുടെ ഭാഗമായി കുടുംബശ്രീ നടപ്പാക്കുന്ന അതിജീവനം ക്യാമ്പെയിനോടനുബന്ധിച്ച് ജില്ലയിൽ ആവിഷ്‌കരിച്ച പദ്ധതിയാണ് ഹോം ഷോപ്പ്. പ്രളയവും കോവിഡ് വ്യാപനവും സൃഷ്ടിച്ച പ്രതിസന്ധിയുടെ ഭാഗമായി ഉത്പന്നങ്ങൾ വിറ്റഴിക്കുന്നതിന് കുടുംബശ്രീ സംരംഭകർ പ്രയാസം നേരിടുന്ന സാഹചര്യത്തിൽ സംരംഭകർക്ക് വരുമാനം ഉറപ്പുവരുത്താനും നൂറിലധികം കുടുംബശ്രീ അംഗങ്ങൾക്ക് ജോലി സാധ്യത ഉറപ്പാക്കാനും പദ്ധതിയിയൂടെ സാധിക്കും. കുടുംബശ്രീ ഉത്പ്പന്നങ്ങൾ ജനങ്ങളിലേക്ക് എത്തിക്കാനുമാകും. നിലവിൽ ജില്ലയിലെ ആലത്തൂർ ബ്ലോക്കിലെ എട്ട് പഞ്ചായത്തുകളിലാണ് ഹോം ഷോപ്പ് നടത്തുന്നത്. വീടുകളിലെത്തി സാധനങ്ങൾ വിൽപ്പന നടത്തുന്നതിന് വാർഡിൽ രണ്ട് ഹോം ഷോപ്പർമാരെ വീതവും 25 ഓളം സംരംഭക യൂണിറ്റുകളേയും പദ്ധതിയുടെ ഭാഗമായി ഉൾപ്പെടുത്തിയിട്ടുണ്ട്. ഉത്പന്നങ്ങൾക്ക് സ്ഥിരമായ ഒരു വിപണന സംവിധാനവും ഹോം ഷോപ്പർമാരായി തിരഞ്ഞെടുക്കുന്ന കുടുംബശ്രീ അംഗങ്ങൾക്ക് തൊഴിലും വരുമാനവും ലഭിക്കും. നിലവിൽ ഏഴംഗ ഹോം ഷോപ്പ് മാനേജ്‌മെന്റ് ടീമിന്റെ നേതൃത്വത്തിലാണ് പദ്ധതി നടപ്പിലാക്കുന്നത്. സംരംഭകരിൽ നിന്നും ഉത്പന്നങ്ങൾ ശേഖരിച്ച് ഹോം ഷോപ്പർമാരുടെ പക്കൽ എത്തിക്കുന്നതും സമയ ബന്ധിതമായി വിപണനത്തിന് സഹായിക്കുന്നതും മാനേജ്‌മെന്റ് ടീമായിരിക്കും. ഉത്പ്പന്നത്തിന്റെ വിറ്റുവരവിൽ നിന്നു തന്നെയാണ് സംരംഭകർ, ഹോം ഷോപ്പർ, മാനേജ്‌മെന്റ് ടീം എന്നിവർക്ക് വരുമാനം ലഭിക്കുന്നത്.

കിഴക്കഞ്ചേരി ഗ്രാമപഞ്ചായത്ത് ഹാളിൽ നടന്ന പരിപാടിയിൽ പഞ്ചായത്ത് വൈസ് പ്രസിഡന്റ് കലാധരൻ, വി.സുരേഷ്‌കുമാർ, സാറാ ഉമ്മ, തങ്കപ്പൻ, കുടുംബശ്രീ ജില്ലാ മിഷൻ കോ ഓർഡിനേറ്റർ പി സെയ്തവലി എന്നിവർ പങ്കെടുത്തു.