അട്ടച്ചാക്കൽ : കോന്നി ഗ്രാമ പഞ്ചായത്ത് ഒന്നാം വാർഡിൽ മണിയൻപാറയിൽ താമസിക്കുന്നതും, കൊക്കാത്തോട്കാട്ടാത്തി ഗിരിജൻ കോളനി സ്വദേശിയുമായ പ്ലാവിളയിൽ മാതു ഭവനത്തിൽ കുഞ്ഞുമോൻ അനിത ദമ്പതികളുടെ മക്കൾക്ക് പഠന സൗകര്യമൊരുക്കി.കോന്നി അട്ടച്ചാക്കൽ സെന്റ് ജോർജ്ജ് സ്‌കൂളിൽ എട്ടാം ക്ലാസിൽ പഠിക്കുന്ന മാതു, 7ൽ പഠിക്കുന്ന മിഥുൻ എന്നിവർക്കാണ് പഠന സൗകര്യം ഒരുക്കിയത്.വീട്ടിൽ വൈദ്യുതി എത്തിയിട്ടില്ലായിരുന്ന കുടുംബത്തിന്റെ അവസ്ഥ തിരിച്ചറിഞ്ഞ വാർഡ് മെമ്പറും വികസന സ്ഥിരം സമിതി അദ്ധ്യക്ഷ ദീനാമ്മ റോയി വീട്ടിൽ വൈദ്യുതി എത്തിക്കുന്നതിനുള്ള നടപടി സ്വീകരിക്കുകയും സ്‌കൂളിൽ നിന്നും വിവരം ലഭിച്ചതിന്റെ അടിസ്ഥാനത്തിൽ പഞ്ചായത്ത് ഭരണ സമിതി ടെലിവിഷൻ വാങ്ങി നൽകുകയുമായിരുന്നു. ആരോഗ്യ വിദ്യാഭ്യാസ സ്ഥിരം സമിതി അദ്ധ്യക്ഷ അനിസാബു കേബിൾ കണക്ഷൻ എടുക്കുന്നതിനുള്ള ക്രമീകരണവും ചെയ്തു. കുട്ടികളുടെ അമ്മയായ അനിതയ്ക്ക് പഞ്ചായത്ത് പ്രസിഡന്റ് രജനി.എം ടെലിവിഷൻ കൈമാറി വൈസ് പ്രസിഡന്റ് പ്രവീൺ പ്ലാവിളയിൽ, ദീനാമ്മ റോയി, അനിസാബു, സുലേഖ. വി. നായർ എന്നിവർ പങ്കെടുത്തു.