കോന്നി: നിയോജക മണ്ഡലത്തിലെ സർക്കാർ, എയ്ഡഡ് സ്‌കൂളുകളിലെ സമ്പൂർണ്ണ ഡിജിറ്റലൈസേഷൻ പൂർത്തിയാക്കിയതിന്റെ ഉദ്ഘാടനം അഡ്വ.കെ.യു.ജനീഷ് കുമാർ എം.എൽ.എ നിർവഹിച്ചു. കോന്നി റിപ്പബ്ലിക്കൻ വൊക്കേഷണൽ ഹയർ സെക്കൻഡറി സ്‌കൂളിലാണ് ഉദ്ഘാടന ചടങ്ങ് നടന്നത്.
ഹൈസ്‌കൂൾ, ഹയർ സെക്കൻഡറി വിഭാഗങ്ങളിൽ ഹൈടെക് ക്ലാസ് റൂമുകളും, പ്രൈമറി വിഭാഗത്തിൽ ഹൈടെക് ലാബുമാണ് സ്ഥാപിച്ചത്.സംസ്ഥാനമൊട്ടാകെ സ്‌കൂളുകൾ ഡിജിറ്റലായതിന്റെ ഉദ്ഘാടനം മുഖ്യമന്ത്രിയാണ് നിർവഹിച്ചത്.
കോന്നി നിയോജക മണ്ഡലത്തിലെ എല്ലാ സ്‌കൂളുകളും ഇതോടെ ഉന്നത നിലവാരത്തിലായി മാറി. പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി എല്ലാ സ്‌കൂളുകളിലും വലിയ വികസന പ്രവർത്തനങ്ങളാണ് നടത്തിയത്.
ബ്ലോക്ക് പഞ്ചായത്ത് പ്രസിഡന്റ് കോന്നിയൂർ പി.കെ അദ്ധ്യക്ഷത വഹിച്ചു. ജില്ലാ പഞ്ചായത്തംഗം എലിസബത്ത് അബു, പഞ്ചായത്ത് പ്രസിഡന്റ് എം.രജനി, ബ്ലോക്ക് പഞ്ചായത്തംഗം ലീലാ രാജൻ, ആനി സാബു, ഗീത, എം.കെ.നരേന്ദ്രനാഥ്, ശശികല.ബി.നായർ, അനിൽ, ദീപ്തി, മനോജ് പുളിവേലിൽ തുടങ്ങിയവർ പ്രസംഗിച്ചു.