പത്തനംതിട്ട : ജില്ലയിൽ ഇന്നലെ 244 പേർക്ക് കൊവിഡ്19 സ്ഥിരീകരിച്ചു. രോഗം സ്ഥിരീകരിച്ചവരിൽ ഒരാൾ വിദേശ രാജ്യത്തുനിന്ന് വന്നതും 12 പേർ മറ്റ് സംസ്ഥാനങ്ങളിൽ നിന്ന് വന്നവരും 231 പേർ സമ്പർക്കത്തിലൂടെ രോഗം ബാധിച്ചവരുമാണ്. ഇതിൽ സമ്പർക്കപശ്ചാത്തലം വ്യക്തമല്ലാത്ത 14 പേരുണ്ട്.

ജില്ലയിൽ ഇതുവരെ ആകെ 11412 പേർക്ക് രോഗം സ്ഥിരീകരിച്ചിട്ടുണ്ട്. ഇതിൽ 8581 പേർ സമ്പർക്കം മൂലം രോഗബാധിതരായവരാണ്. ഇന്നലെ കൊവിഡ് ബാധിതനായ ഒരാൾ മരിച്ചു. ഒക്ടോബർ ഒന്നിന് രോഗബാധ സ്ഥിരീകരിച്ച തിരുവല്ല സ്വദേശി (57) കോഴഞ്ചേരി ജില്ലാ ആശുപത്രിയിൽ മരിച്ചു. കൊവിഡ് മൂലം ജില്ലയിൽ ഇതുവരെ 67 പേർ മരണമടഞ്ഞു. കൂടാതെ കോവിഡ് ബാധിതരായ മൂന്നു പേർ മറ്റ് രോഗങ്ങൾ മൂലമുളള സങ്കീർണതകൾ നിമിത്തം മരണമടഞ്ഞിട്ടുണ്ട്.
ജില്ലയിൽ ഇന്നലെ 321 പേർ രോഗമുക്തരായി. ആകെ രോഗമുക്തരായവരുടെ എണ്ണം 8208 ആണ്. ജില്ലക്കാരായ 3134 പേർ ചികിത്സയിലാണ്.

കണ്ടെയ്ൻമെന്റ് സോണുകൾ

ഇരവിപേരൂർ ഗ്രാമപഞ്ചായത്തിലെ വാർഡ് നാല് ഇരവിപേരൂർ തെക്ക് മുരിങ്ങശേരി ഭാഗം മുതൽ ഒഴുക്ക് തോട് ഭാഗം വരെ (മൈക്രോ കണ്ടെയ്ൻമെന്റ് സോൺ), വാർഡ് 11 (കോഴിമല ), വാർഡ് 12 (നന്നൂർ കിഴക്ക്)എന്നീ സ്ഥലങ്ങളിൽ ഏഴു ദിവസത്തേക്ക് കണ്ടെയ്ൻമെന്റ് സോൺ നിയന്ത്രണം.

നിയന്ത്രണം ഒഴിവാക്കി

തണ്ണിത്തോട് ഗ്രാമപഞ്ചായത്തിലെ വാർഡ് ഏഴ്, എഴുമറ്റൂർ ഗ്രാമപഞ്ചായത്തിലെ വാർഡ് നാല്, 14 എന്നീ സ്ഥലങ്ങൾ കണ്ടെയ്ൻമെന്റ് സോൺ നിയന്ത്രണത്തിൽ നിന്ന് ഒഴിവാക്കി.