കോന്നി: ഗവ.മെഡിക്കൽ കോളേജ് രണ്ടാംഘട്ട നിർമ്മാണത്തിന് കിഫ്ബിയിൽ നിന്ന് 241.01 കോടി രൂപ അനുവദിച്ചു. ആദ്യഘട്ട നിർമ്മാണത്തിന് 115 കോടി രൂപയാണ് ഇതുവരെ ചെലവഴിച്ചത്. രണ്ടാംഘട്ടത്തിന് ഇരട്ടിയിലധികം തുക അനുവദിച്ചതോടെ കോന്നി മെഡിക്കൽ കോളേജ് സംസ്ഥാനത്തെ പ്രധാന ആരോഗ്യ കേന്ദ്രമായി മാറും. 337.06 കോടി രൂപയുടെ പദ്ധതിയാണ് രണ്ടാംഘട്ടത്തിനായി തയ്യാറാക്കി സമർപ്പിച്ചിരുന്നത്. ഇതിൽ ഉപകരണങ്ങൾ വാങ്ങുന്നതിനുള്ള തുക അനുവദിക്കുന്നത് അടുത്ത കിഫ്ബി ബോർഡ് പരിഗണിക്കും. പുതിയ ആശുപത്രി ബ്ലോക്ക്, കോളേജ് ആൻഡ് അഡ്മിനിസ്ട്രേഷൻ ബ്ലോക്ക്, ആൺകുട്ടികളുടെയും പെൺകുട്ടികളുടെയും ഹോസ്റ്റൽ, ടൈപ്പ് എ, ബി, സി, ഡി അപ്പാർട്ട്മെൻ്റുകൾ, ഡീൻസ് വില്ല, ആഡിറ്റോറിയം, മോർച്ചറി, ലോൺട്രി തുടങ്ങിയാണ് രണ്ടാം ഘട്ടത്തിൽ നിർമ്മിക്കുന്നത്.

ഏഴ് നിലകളിലായി ആശുപത്രി കെട്ടിടം നിർമ്മിക്കും

ഇപ്പോൾ അനുവദിച്ചതിൽ ഏറ്റവും പ്രധാനപ്പെട്ടത് 13644 സ്ക്വയർ മീറ്റർ വിസ്തീർണ്ണമുള്ള 7 നിലയിൽ നിർമ്മിക്കുന്ന പുതിയ ആശുപത്രി കെട്ടിടമാണ്.

ഒന്നാം നിലയിൽ റിസപ്ഷൻ, ഫാർമസി, നേത്രരോഗ വിഭാഗത്തിന്റെയും അസ്ഥിരോഗ വിഭാഗത്തിന്റെയും ഒ.പി.വിഭാഗം തുടങ്ങിയവ പ്രവർത്തിക്കും.

രണ്ടാം നിലയിൽ ജനറൽ സർജറി, ഇ.എൻ.ടി, ടി.ബി ആൻഡ് റസ്പിറേറ്ററി വിഭാഗം തുടങ്ങിയവയുടെ ഒ.പി.യാണ് പ്രവർത്തിക്കുക.
മൂന്നാം നിലയിൽ ജനറൽ സർജറി, അസ്ഥിരോഗ വിഭാഗം, ഇ.എൻ.ടി എന്നീ ഡിപ്പാർട്ടുമെന്റുകൾ പ്രവർത്തിക്കും.
നാലാം നിലയിൽ ജനറൽ സർജറി, നേത്രരോഗ വിഭാഗം തുടങ്ങിയവയുടെ വാർഡുകളായിരിക്കും.
അഞ്ചാം നിലയിൽ ജനറൽ സർജറി വാർഡും, ഇ.എൻ.ടി വാർഡും പ്രവർത്തിക്കും.

ആറാം നിലയിൽ അസ്ഥിരോഗ വിഭാഗം, ത്വക്ക് രോഗവിഭാഗം എന്നിവയുടെ 2 വാർഡുകൾ വീതം പ്രവർത്തിക്കും.
ഏഴാം നിലയിൽ ഐസൊലേഷൻ വാർഡ് ,റ്റി.ബി ആൻറ് റസ്പിറേറ്ററി വിഭാഗത്തിന്റെ വാർഡ് തുടങ്ങിയവയുണ്ടാകും.

ആൺകുട്ടികൾക്കും പെൺകുട്ടികൾക്കും ഹോസ്റ്റൽ

പെൺകുട്ടികളുടെ ഹോസ്റ്റൽ 6 നിലകളിലായാണ് നിർമ്മിക്കുന്നത്. 5191 സ്ക്വയർ മീറ്ററാണ് വിസ്തീർണ്ണം. ആൺ കുട്ടികളുടെ ഹോസ്റ്റൽ 5 നിലകളിലും. 4349 സ്ക്വയർ മീറ്റർ വിസ്തീർണ്ണം.
പതിനൊന്ന് നിലകളിലായാണ് ക്വാർട്ടേഴ്സ് അപ്പാർട്ട്മെന്റ് നിർമ്മിക്കുന്നത്. ടൈപ്പ് എ, ബി, സി, ഡി എന്നിങ്ങനെ നാല് വിഭാഗങ്ങളിലായാണ് അപ്പാർട്ട്മെൻ്റ് ഉണ്ടാക്കുക. ടൈപ്പ് എ 2497 സ്ക്വയർ മീറ്ററും, ടൈപ്പ് ബി 2497 സ്ക്വയർ മീറ്ററും, ടൈപ്പ് സി 3264 സ്ക്വയർ മീറ്ററും, ടൈപ്പ് ഡി 6097 സ്ക്വയർ മീറ്ററും വിസ്തീർണ്ണം വീതമാണ് ഉണ്ടാവുക.
പ്രിൻസിപ്പാളിനു താമസിക്കുന്നതിനുള്ള ഡീൻസ് വില്ല രണ്ട് നിലയിലാണ് നിർമ്മിക്കുന്നത്.ഇതിന് 289 സ്ക്വയർ മീറ്റർ വിസ്തീർണ്ണമുണ്ടാകും.
7816 സ്ക്വയർ മീറ്ററിലുള്ള ഓഡിറ്റോറിയമാണ് നിർമ്മിക്കുക. ഇതിൽ വി.ഐ.പി റൂമുകളും, പാർക്കിംഗ് ഏരിയയും ഉൾപ്പെടും.
409 സ്ക്വയർ മീറ്ററിലാണ് മോർച്ചറി നിർമ്മിക്കുന്നത്. ലോഞ്ച്, ഡോക്ടറുടെ മുറി, ടെക്നീഷ്യൻമാരുടെ മുറികൾ, സ്റ്റോർ റൂം എന്നിവ ഉൾപ്പെടുത്തിയാണ് മോച്ചറി നിർമ്മിക്കുന്നത്.
625 സ്ക്വയർ മീറ്ററിലാണ് ലോൺട്രി നിർമ്മിക്കുന്നത്‌.

24 മാസത്തിനകം നിർമ്മാണം പൂർത്തീകരിക്കുന്ന നിലയിലാണ് രണ്ടാം ഘട്ട പദ്ധതി വിഭാവനം ചെയ്തിരിക്കുന്നത്. രണ്ടു മാസത്തിനകം തറക്കല്ലിട്ട് നിർമ്മാണം ആരംഭിക്കാൻ കഴിയും.

കെ.യു. ജനീഷ് കുമാർ എം.എൽ.എ