കോന്നി : അട്ടച്ചാക്കൽ- കുമ്പളാംപൊയ്ക റോഡ് നിർമ്മാണത്തിന് 1.45 കോടി രൂപ കൂടി അധിക തുകയായി അനുവദിച്ചതായി അഡ്വ.കെ.യു.ജനീഷ് കുമാർ എം.എൽ.എ അറിയിച്ചു .ആദ്യഘട്ടത്തിൽ കിഫ്ബി പദ്ധതിയിൽ ഉൾപ്പെടുത്തി 14.62 കോടി രൂപ അനുവദിച്ച് നിർമ്മാണം നടത്തിയിരുന്നു.
എന്നാൽ ഈ തുകയിൽ റോഡ് സേഫ്റ്റി വർക്കുകളും ഡ്രയിനേജ് വർക്കുകളും ഉൾപ്പെടുത്തിയിരുന്നില്ല. ഇതിനായാണ് അധികതുക കിഫ്ബിയിൽ നിന്ന് അനുവദിച്ചത്.പതിമൂന്ന് കിലോമീ​റ്റർ ദൂരമുള്ള റോഡ് 5.5 മീ​റ്റർ വീതിയിൽ ബി.എം.ആൻഡ് ബി.സി ടാറിംഗ് നടത്തി പൂർത്തീകരിച്ചിട്ടുണ്ട്. സൂചനാ ബോർഡ്, അപകടകരമായ സ്ഥലങ്ങളിൽ ക്രാഷ് ബാരിയർ, ഡ്രയിനേജ് സൗകര്യം, ഐറിഷ് ഓട തുടങ്ങിയവ നിർമ്മിക്കും. . കോന്നി, മലയാലപ്പുഴ, വടശേരിക്കര പഞ്ചായത്തുകളിലൂടെയാണ് റോഡ് പോകുന്നത്.
കോന്നിയിലെയും മലയാലപ്പുഴയിലെയും മലയോര മേഖലയിലെ ജനങ്ങളും, തോട്ടം തൊഴിലാളികളും പ്രധാനമായും ഉപയോഗിക്കുന്ന റോഡാണിത്. ശബരിമല തീർത്ഥാടകർക്ക് വടശേരിക്കരയിൽ നിന്ന് കോന്നി മെഡിക്കൽ കോളേജിൽ എത്തുന്നതിനുള്ള പ്രധാന പാതയുമാണ്