കോന്നി: കോന്നി താലൂക്ക് ആശുപത്രിയുടെ സമഗ്ര വികസനത്തിനുള്ള പദ്ധതികൾ ഉടൻ തന്നെ നടപ്പിലാക്കാൻ കെ.യു.ജനീഷ് കുമാർ എം.എൽ.എയുടെ അദ്ധ്യക്ഷതയിൽ ചേർന്ന ആരോഗ്യ വകുപ്പ് കോന്നി നിയോജക മണ്ഡലം തല അവലോകന യോഗത്തിൽ തീരുമാനമായി. ഡി.എം.ഒ ഡോ: സി.എസ്.നന്ദിനി, പൊതുമരാമത്ത് കെട്ടിടവിഭാഗം എക്‌സി.എൻജിനീയർ സി.കെ.ഹരീഷ് കുമാർ, നാഷണൽ ഹെൽത്ത് മിഷൻ ജില്ലാ പ്രോഗ്രാം മാനേജർ ഡോ: എബി സുഷൻ, താലൂക്ക് ആശുപത്രി സൂപ്രണ്ട് ഇൻചാർജ് ഡോ: എം.ടി.സിമി, ആർ.എം.ഒ ഇൻ ചാർജ് ഡോ: അജയ് ഏബ്രഹാം തുടങ്ങിയവർ പങ്കെടുത്തു.

കിടക്കകളുടെ എണ്ണം നൂറായി ഉയർത്തി അനുമതി വാങ്ങാൻ തീരുമാനിച്ചു. സാമൂഹ്യ ആരോഗ്യ കേന്ദ്രത്തിന്റെ എണ്ണത്തിലുള്ള 30 കിടക്കകൾ മാത്രമേ നിലവിലുള്ളു. അടിയന്തിരമായി ഇത് 50 ആയും, തുടർന്ന് 100 ആയും ഉയർത്തുന്നതു സംബന്ധിച്ച നടപടി സ്വീകരിക്കാനാണ് തീരുമാനമായത്. കിടക്കകളുടെ എണ്ണം കൂട്ടുന്നതു സംബന്ധിച്ച് തീരുമാനമാകുമ്പോൾ കൂടുതൽ തസ്തികകൾ അനുവദിക്കാനുള്ള നടപടി സ്വീകരിക്കും.

10 കോടിയുടെ വികസനം

പത്ത് കോടി രൂപയുടെ വികസന പദ്ധതികൾ താലൂക്ക് ആശുപത്രിയിൽ നടപ്പിലാക്കും.നിലവിലുള്ള കാഷ്വാലി​റ്റി കെട്ടിടത്തിനു മുകളിലായി 5നില കെട്ടിടം കൂടി നിർമ്മിക്കും.ഇതിനുള്ള ടെൻഡർ നടപടികൾ പൂർത്തിയായി.

വെന്റുലേറ്ററോടുകൂടിയ ഐ.സി.യു

വെന്റിലേ​റ്റർ സൗകര്യത്തോടെയുള്ള ഐ.സി.യു ആശുപത്രിയിൽ സജ്ജീകരിക്കും. എം.എൽ.എ ഫണ്ടിൽ നിന്നും 3231161 രൂപ വെന്റിലേ​റ്ററിനും, അനുബന്ധ സൗകര്യങ്ങൾക്കുമായി അനുവദിച്ചിരുന്നു. പദ്ധതി നടപ്പിലാക്കാനായി ജില്ലാ മെഡിക്കൽ ഓഫീസറെ ചുമതലപ്പെടുത്തിയിട്ടുണ്ട്.
രണ്ട് വെന്റിലേ​റ്റർ വാങ്ങി താലൂക്ക് ആശുപത്രിയിൽ എത്തിച്ചിട്ടുണ്ട്. ഐ.സി.യു ആരംഭിക്കുന്നതിനുള്ള കിടക്കകളും അനുബന്ധ സൗകര്യങ്ങളും എൻ.എച്ച്.എം ൽ നിന്നും അനുവദിക്കും. സ്​റ്റാന്റോടുകൂടിയ 25 ഓക്‌സിജൻ സിലണ്ടർ, 50 വീൽചെയർ ,5000 ത്രീ ലെയർ മാസ്‌ക്, പി.പി.ഇ കി​റ്റ്, എൻ 95 മാസ്‌ക്, സാനി​റ്റൈസർ തുടങ്ങിയവയും വാങ്ങി നല്കും.