തിരുവല്ല: ഗുണ്ടാ സംഘങ്ങൾ തമ്മിലുള്ള വൈരാഗ്യത്തെ തുടർന്ന് വീട് അടിച്ചുതകർത്ത കേസിലെ രണ്ട് പ്രതികൾ പിടിയിൽ. ചങ്ങനാശേരി വാഴപ്പള്ളി പണ്ടകശാലക്കടവിൽ മുളയ്ക്കൽ ചിറയിൽ വീട്ടിൽ അരുൺ ബാബു (32), വെളിയനാട് കുമരങ്കേരി ശാസ്താം പറമ്പിൽ സുബിൻ (34) എന്നിവരാണ് തിരുവല്ല പൊലീസിന്റെ പിടിയിലായത് . കഴിഞ്ഞ മാസം 26നായിരുന്നു ആക്രമണം. . പുലർച്ചെ അഞ്ചിന് ഗുണ്ടാ നേതാവായ റോഷന്റെ തിരുവല്ല തുകലശേരിയിലെ വീടിന് നേരെ രണ്ടംഗ സംഘം പെട്രോൾ ബോബ് എറിഞ്ഞിരുന്നു. പ്രത്യാക്രമണത്തിന്റെ ഭാഗമായി അന്ന് രാവിലെ 6.45ന് ഗുണ്ടാ സംഘത്തിൽ ഉൾപ്പെട്ട ചങ്ങനാശേരി മാടമുക്ക് സ്വദേശിയായ വിപിന്റെ വീട് പന്ത്രണ്ടംഗ സംഘം അടിച്ചു തകർത്തു. ഈ കേസിലെ പ്രതികളാണ് അറസ്റ്റിലായത്. റോഷന്റെ വീട് ആക്രമിച്ച കേസിലെ രണ്ട് പ്രതികളും വിപിന്റെ വീട് ആക്രമിച്ച സംഭവത്തിലെ 10 പ്രതികളും പിടിയിലാകാനുണ്ട്. തിരുവല്ല സി.ഐ പി.എസ് വിനോദ്, എസ്.ഐ എസ്.സലിം, എ.എസ്.ഐ ബി.സാബു എന്നിവരടങ്ങുന്ന സംഘമാണ് പ്രതികളെ പിടികൂടിയത്. അറസ്റ്റിലായ ഇരുവരും നിരവധി ക്രിമിനൽ കേസുകളിലെ പ്രതികളാണെന്ന് പൊലീസ് പറഞ്ഞു.