കൊല്ലം: ജില്ലയിൽ കഴിഞ്ഞ രണ്ടുദിവസത്തിനിടയിൽ 1,426 പേർക്ക് കൊവിഡ് സ്ഥിരീകരിച്ചു. ഇന്നലെ 534 പേർക്കും വെള്ളിയാഴ്ച 892 പേർക്കുമാണ് കൊവിഡ് സ്ഥിരീകരിച്ചത്. ഇതോടെ ജില്ലയിൽ കൊവിഡ് ബാധിച്ച് ചികിത്സയിലുള്ളവരുടെ എണ്ണം ഏഴായിരം കടന്നു.

ഇന്നലെ രോഗം സ്ഥീകരിച്ച രണ്ടുപേർ അന്യസംസ്ഥാനങ്ങളിൽ നിന്ന് വന്നതാണ്. 531 പേർ സമ്പർക്കത്തിലൂടെയാണ് രോഗബാധിതരായത്. ഒരാൾക്ക് രോഗം ബാധിച്ച ഉറവിടം വ്യക്തമല്ല. സെപ്തംബർ 25ന് മരിച്ച കൊല്ലം സ്വദേശി ശത്രുഘ്നൻ ആചാരി (86), സെപ്തംബർ 28ന് മരിച്ച കരുനാഗപ്പള്ളി സ്വദേശി രമേശൻ (63), സെപ്തംബർ 29ന് മരിച്ച തങ്കശേരി സ്വദേശി നെൽസൺ (56), മയ്യനാട് സ്വദേശി എം.എം.ഷെഫി (68), സെപ്തംബർ 30ന് മരിച്ച കൊല്ലം ഓയൂർ സ്വദേശി ഫസിലുദീൻ (76), ഒക്ടോബർ 1ന് മരിച്ച കരുനാഗപ്പള്ളി സ്വദേശി സുരേന്ദ്രൻ (66) എന്നിവരുടെ മരണം കൊവിഡ് മൂലമാണെന്ന് സ്ഥിരീകരിച്ചു.

ഇന്നലെ 285 പേരും വെള്ളിയാഴ്ച 295 പേരും രോഗമുക്തരായി. ഇതോടെ ജില്ലയിൽ കൊവിഡ് ബാധിച്ച് ചികിത്സയിലുള്ളവരുടെ എണ്ണം 7,091 ആയി.