അഞ്ചൽ: മലയാറ്റൂർ അവാർഡിനും യുവ എഴുത്തുകാർക്കുള്ള മലയാറ്റൂർ പ്രൈസിനും കൃതികൾ ക്ഷണിച്ചു. 2017 ജനുവരി 1ന് ശേഷം പ്രസിദ്ധീകരിച്ച മലയാളത്തിലെ ഏറ്റവും മികച്ച മൗലിക സാഹിത്യ കൃതികളാണ് പരിഗണിക്കുന്നത്. 25001 രൂപയും ആർട്ടിസ്റ്റ് ബി.ഡി. ദത്തൻ രൂപകല്പന ചെയ്ത ശില്പവും പ്രശസ്തി പത്രവും അടങ്ങുന്നതാണ് മലയാറ്റൂർ അവാർഡ്. ഏറ്റവും നല്ല നവാഗത എഴുത്തുകാർക്കുള്ള മലയാറ്റൂർ പ്രൈസ് 5001 രൂപയും ശില്പവും പ്രശസ്തി പത്രവുമാണ്. ഗ്രന്ഥകർത്താക്കൾക്കോ പുസ്തക പ്രസാധകർക്കോ സാഹിത്യ ആസ്വാദകർക്കോ പുസ്തകങ്ങൾ അയയ്ക്കാം. വായനക്കാരുടെ ശുപാർശകളും അവാർഡ് കമ്മിറ്റി പരിഗണിക്കും. ജഡ്ജിംഗ് കമ്മിറ്റിക്ക് സമർപ്പിക്കാനായി കൃതികളുടെ മൂന്ന് പ്രതികളും വായനക്കാരുടെ ശുപാർശകളും നവംബർ 30ന് മുൻപ് ലഭിക്കത്തക്ക വിധം ഡോ. വി.കെ. ജയകുമാർ, ചെയർമാൻ, മലയാറ്റൂർ സ്മാരക സമിതി, ശബരിഗിരി, അഞ്ചൽ പി.ഒ., കൊല്ലം ജില്ല 691306 വിലാസത്തിൽ ലഭിക്കണമെന്ന് സെക്രട്ടറി അനീഷ് കെ. അയിലറ അറിയിച്ചു.