തൃശൂർ: വിദ്യാർത്ഥികൾക്ക് രാജ്യത്തുടനീളമുള്ള എഴുപതിലധികം സംസ്ഥാന, കേന്ദ്ര, കാർഷിക സർവകലാശാലകളിൽ ഉന്നതപഠനം നടത്തുന്നതിന് അവസരമൊരുക്കി കാർഷിക സർവകലാശാലയ്ക്ക് എൻ.എ.ഇ.എ.ബി അംഗീകാരം. മറ്റ് സംസ്ഥാനങ്ങളിലെ കാർഷിക സർവകലാശാലകളിൽ നിന്നുള്ള വിദ്യാർത്ഥികൾക്ക് ഇവിടെ ഉന്നതപഠനം നടത്തുന്നതിനും ഈ അംഗീകാരം സഹായകമാകും.
ഇന്ത്യൻ കാർഷിക ഗവേഷണ കൗൺസിലിന് കീഴിലുള്ള ദേശീയ കാർഷിക വിദ്യാഭ്യാസ അക്രഡിറ്റേഷൻ ബോർഡിന്റെ (എൻ.എ.ഇ.എ.ബി) അംഗീകാരമാണിത്. ഇതോടെ ഐ.സി.എ.ആറിൽ നിന്നുള്ള ധനസഹായം ലഭിക്കുന്നതിന് കേരള കാർഷിക സർവകലാശാലയെ യോഗ്യമാക്കും. മത്സരാധിഷ്ഠിത ഗവേഷണ ഗ്രാൻഡ് ലഭിക്കുന്നതിന് സർവകലാശാലയ്ക്കും, ഫാക്കൽറ്റികൾക്കും സഹായമാകും.
2020 - 21 അദ്ധ്യയന വർഷം മുതൽ സർവകലാശാല ആരംഭിക്കുന്ന നാലുവർഷത്തെ കാലാവസ്ഥാ വ്യതിയാന പരിസ്ഥിതി സയൻസിലുള്ള ബി.എസ്.സി കോഴ്‌സിനുള്ള അംഗീകാരത്തിനായി കൗൺസിൽ ശുപാർശപ്രകാരം ആവശ്യമായ നടപടികൾ കൈക്കൊണ്ടിട്ടുമുണ്ട്. സർവകലാശാലയ്ക്കും അതിനു കീഴിലുള്ള വിവിധ കോളജുകൾക്കും അക്കാഡമിക് പ്രോഗ്രാമുകൾക്ക് തുടർന്നുള്ള അഞ്ചു വർഷക്കാലത്തേക്കാണ് അംഗീകാരം ലഭിച്ചത്.
അംഗീകാരം പഠനറിപ്പോർട്ട് പ്രകാരം
സംസ്ഥാന, കേന്ദ്ര കാർഷിക സർവകലാശാലകളിൽ വിദ്യാഭ്യാസ നിലവാരം മെച്ചപ്പെടുത്തുന്നതിന് ലക്ഷ്യമിട്ടുള്ള ഐ.സി.എ.ആറിന് കീഴിലുള്ള സ്ഥാപനമാണ് ദേശീയ കാർഷിക വിദ്യാഭ്യാസ അക്രഡിറ്റേഷൻ ബോർഡ്. 2020 ജനുവരിയിൽ അക്രഡിറ്റേഷൻ ബോർഡ് നിയമിച്ച വിദഗ്ദ്ധസംഘം സർവകലാശാലയും, ഇതിന് കീഴിലുള്ള കോളേജുകളും സന്ദർശിച്ച് തയ്യാറാക്കിയ പഠന റിപ്പോർട്ട്, സ്‌കോർ ബോർഡ് എന്നിവ വിശദമായി വിലയിരുത്തിയാണ് അംഗീകാരം നൽകിയത്. അക്രഡിറ്റേഷൻ പ്രക്രിയയിൽ കാർഷിക സർവകലാശാലയും അനുബന്ധ കോളേജുകളായ വെള്ളാനിക്കര കാർഷിക കോളേജ്, വെള്ളാനിക്കര ഫോറസ്ട്രി കോളേജ് എന്നിവയും വെള്ളാനിക്കര കോ- ഓപറേഷൻ ആൻഡ് ബാങ്കിംഗ് കോളേജിലെ എം.ബി.എ പ്രോഗ്രാമും ഉയർന്ന സകോർ നേടി. ഈ കോളേജുകളിലുള്ള ബിരുദ, ബിരുദാനന്തര, പി.എച്ച്.ഡി പ്രോഗ്രാമുകൾക്കുള്ള അംഗീകാരമാണ് ലഭിച്ചത്.
കോഴ്‌സുകൾക്ക് പ്രാധാന്യമേറും
കൃഷിപഠനത്തിൽ കനത്ത സംഭാവനകൾ നൽകുന്ന കേരള കാർഷിക സർവകലാശാലയ്ക്ക് ലഭിക്കുന്ന അംഗീകാരത്തോടെ കോഴ്‌സുകൾക്ക് പ്രാധാന്യമേറും. കാർഷിക ഗവേഷണത്തിനും കൃഷി പഠനത്തിനുമായി നിരവധി കോഴ്‌സുകൾ സർവകലാശാലയുടെ കീഴിൽ നടത്തുന്നുണ്ട്. കാർഷിക സർവകലാശാലക്ക് കീഴിൽ കോളേജുകളും പ്രാദേശിക കാർഷിക ഗവേഷണ കേന്ദ്രങ്ങളും കൃഷി വിജ്ഞാന കേന്ദ്രങ്ങളും അഡ്വാൻസ്ഡ് സ്റ്റഡി സെന്ററുകളുമുണ്ട്. ഇവിടങ്ങളിലായി നിരവധി ബിരുദ, ബിരുദാനന്തര ബിരുദ കോഴ്‌സുകളുമുണ്ട്