ചാവക്കാട്: താലൂക്ക് ആശുപത്രിയിലും കടപ്പുറം പഞ്ചായത്ത് സി.എച്ച്.സി.യിലുമായി ഇന്നലെ നടന്ന ആന്റിജൻ പരിശോധനയിൽ 38 പേർക്ക് കൊവിഡ് സ്ഥിരീകരിച്ചു. താലൂക്ക് ആശുപത്രിയിൽ 59 പേർക്ക് നടത്തിയ പരിശോധനയിൽ എട്ട് പേർക്ക് കൊവിഡ് സ്ഥിരീകരിച്ചു. ഇതിൽ അഞ്ച് പേർ ചാവക്കാട് നഗരസഭാ പരിധിയിലുള്ളവരാണ്. ഗുരുവായൂർ, മുല്ലശ്ശേരി, പുന്നയൂർ എന്നിവിടങ്ങളിൽ നിന്നുള്ള ഓരോരുത്തർക്കും കൊവിഡ് സ്ഥിരീകരിച്ചു. കടപ്പുറം സി.എച്ച്.സി.യിൽ നടത്തിയ ആന്റിജൻ പരിശോധനയിൽ പുതുതായി 30 പേർക്ക് കൂടി കൊവിഡ് സ്ഥിരീകരിച്ചു. ഇതിൽ 26 പേർ കടപ്പുറം പഞ്ചായത്തിൽ നിന്നുള്ളവരാണ്. നാലുപേർ ചാവക്കാട്ടെ സ്വർണ വ്യാപാര സ്ഥാപനത്തിലെ ജീവനക്കാരാണ്. കടപ്പുറം സി.എച്ച്.സി.യിൽ ആകെ 86 പേരാണ് പരിശോധനക്ക് വിധേയരായത്. കടപ്പുറത്ത് 26 പേർക്ക് കൊവിഡ് സ്ഥിരീകരിച്ചെങ്കിലും ആശങ്കപ്പെടേണ്ട സാഹചര്യമില്ലെന്ന് ആരോഗ്യ, പഞ്ചായത്ത് അധികൃതർ അറിയിച്ചു. നേരത്തെ രോഗം സ്ഥിരീകരിച്ചവരുടെ മറ്റു കുടുംബാംഗങ്ങളിലാണ് കൂടുതലായും കൊവിഡ് കണ്ടെത്തിയിട്ടുള്ളത്. പഞ്ചായത്ത് പതിനാലാം വാർഡിൽ ഒരു വീട്ടിലെ ഏഴ് പേർക്കും, പതിനഞ്ചാം വാർഡിൽ ഒരു വീട്ടിലെ നാല് പേർക്കും കൊവിഡ് സ്ഥിരീകരിച്ചു. ചാവക്കാട് നഗരസഭ പരിധിയിലും കൊവിഡ് രോഗികളുടെ എണ്ണത്തിൽ വലിയ കുറവുണ്ടായിട്ടുണ്ട്. ഒരാഴ്ച്ച മുമ്പ് വരെ പ്രതിദിനം 15 മുതൽ 30 വരെ കൊവിഡ് രോഗികൾ ഉണ്ടായിരുന്ന സ്ഥാനത്ത് ഏതാനും ദിവസങ്ങളായി പത്തിൽ താഴെയായിട്ടുണ്ട്.