കല്ലമ്പലം: ഒറ്റപ്പെട്ട് കഴിയുന്ന വയോജനങ്ങൾക്കും മുതിർന്ന പൗരൻമാർക്കും തണലായി നാവായിക്കുളം ആയുർവേദ ആശുപത്രി കോമ്പൗണ്ടിൽ നിർമ്മിച്ച പകൽവീടിന്റെ ഉദ്ഘാടനം അഡ്വ. അടൂർപ്രകാശ് എം.പി നിർവഹിച്ചു. പഞ്ചായത്ത്‌ പ്രസിഡന്റ്‌ കെ. തമ്പി അദ്ധ്യക്ഷത വഹിച്ചു. നാവായിക്കുളം പഞ്ചായത്തിന്റെ തനതു ഫണ്ടിൽ നിന്നാണ് സംരംഭം തുടങ്ങിയത്.

രണ്ട് നേരം ലഘു ഭക്ഷണവും, ഉച്ചഊണും നൽകും. പരിപാലനത്തിനായി മെഡിക്കൽ സേവനവും ലഭ്യമാക്കും. 60 വയസിനു മുകളിൽ പ്രായമുള്ള നിരാംലംബരായവർക്കാണ് പകൽവീട് ആശ്രയമാകുന്നത്. പഞ്ചായത്ത് ഫണ്ടിൽ നിന്ന് 6 ലക്ഷം രൂപ ചിലവഴിച്ചാണ് പദ്ധതി പൂർത്തീകരിച്ചിരിക്കുന്നത്. രാവിലെ ഒൻപതു മുതൽ വൈകിട്ട് അഞ്ച് വരെയാണ് പകൽവീടിന്റെ പ്രവർത്തനസമയം. പ്രവേശനം സൗജന്യമാണ്. വിനോദങ്ങൾക്കുള്ള മുറി, വിശ്രമ മുറി, പാചകശാല, ശുചിമുറി തുടങ്ങിയ സൗകര്യങ്ങളും കെട്ടിടത്തിലുണ്ട്. കൂടാതെ വയോജനങ്ങൾക് സ്വയംതൊഴിൽ പരിശീലനവും നൽകും. വായനശാല, മാനസിക ഉല്ലാസത്തിനായി ചെസ് ബോർഡ്, വിനോദോപാധിയായി ടെലിവിഷൻ തുടങ്ങിയ സൗകര്യങ്ങൾ ഉടൻ ഏർപ്പെടുത്തും.