ചെറുതോണി: ഉടുമ്പൻചോല-കല്ലുപാലത്ത് നിന്ന് എട്ടരകിലോ കഞ്ചാവുമായി രണ്ടു യുവാക്കളെ ഇടുക്കി എക്‌സൈസ് സ്‌പെഷ്യൽ സ്‌ക്വാഡ് അറസ്റ്റു ചെയ്തു.കൂടെയുണ്ടായിരുന്ന രണ്ടുപേർ ഓടി രക്ഷപ്പെട്ടു.ഉടുമ്പൻചോല ചതുരംഗപ്പാറ കുന്നേൽ അനൂപ് തോമസ് (28), ഉടുമ്പൻചോല പന്തിരിക്കൽ റൂബിൻ പി. ദേവസ്യ (26)എന്നിവരാണ് അറസ്റ്റിലായത്.കഞ്ചാവ് കടത്താൻ ഉപയോഗിച്ച വാഹനവും എക്‌സൈസ് സംഘം പിടിച്ചെടുത്തു.
ഇന്നലെ പുലർച്ചെ മൂന്നോടെ ഇടുക്കി എക്‌സൈസ് എൻഫോഴ്സ്‌മെന്റ് ആന്റ് ആന്റി നാർക്കോട്ടിക്ക് സ്‌പെഷ്യൽ സ്‌ക്വാഡ് സർക്കിൾ ഇൻസ്‌പെക്ടർ സുരേഷ് കുമാറിന്റെ നേതൃത്വത്തിലുള്ള സംഘം കല്ലുപാലം സെന്റ് മേരീസ് പള്ളിയുടെ സമീപത്തുനിന്നും കഞ്ചാവ് കടത്തുകാർ ഉപയോഗിച്ചിരുന്ന വാഹനം ഉൾപ്പെടെ പിടികൂടുകയായിരുന്നു. തമിഴ്നാട്ടിൽ നിന്നും കഞ്ചാവ് വാഹനത്തിൽ കടത്തിക്കൊണ്ടുവരികയായിരുന്നു. സംഭവസ്ഥലത്ത് നിന്നും ഓടിരക്ഷപെട്ട രാജേന്ദ്രൻ, പ്രഭു എന്നിവർക്കായുള്ള അന്വേഷണം ഊർജ്ജിതമാക്കിയെന്ന് എക്‌സൈസ് സർക്കിൾ ഇൻസെപെക്ടർ സുരേഷ് കുമാർ പറഞ്ഞു.
റെയ്ഡിൽ പ്രിവന്റീവ് ഓഫീസർമാരായ കെ.ഡി സജിമോൻ, പി.ആർ സുനിൽകുമാർ, പ്രിവന്റീവ് ഓഫീസർ ഗ്രേഡ് വി.പി വിശ്വനാഥൻ, സിവിൽ എക്‌സൈസ് ഓഫീസർമാരായ പി.എം ജലീൽ, കെ.എൻ സിജുമോൻ, അനൂപ് തോമസ്, ജോഫിൻ ജോൺ, കെ.എസ് വിഷ്ണു രാജ്, അഗസ്റ്റിൻ തോമസ് എന്നിവർ പങ്കെടുത്തു.