കൊല്ലം: കുട്ടികളുടേത് ഉൾപ്പെടെ നഗ്ന ദൃശ്യങ്ങളും അശ്ലീല വീഡിയോകളും വിവിധ പോൺ സൈറ്റുകളിൽ നിന്ന് ഡൗൺലോഡ് ചെയ്‌ത് പ്രചരിപ്പിച്ചവർക്കെതിരെ വ്യാപക പൊലീസ് നടപടി. ഇന്നലെ കൊല്ലം റൂറൽ പൊലീസ് വിവിധ ഭാഗങ്ങളിൽ നടത്തിയ പരിശോധനയിൽ ഒരാൾ അറസ്റ്റിലായി. ഓപ്പറേഷൻ പി ഹണ്ട് 2ന്റെ ഭാഗമായി കുണ്ടറ, കൊട്ടാരക്കര, പുത്തൂർ, പൂയപ്പള്ളി, കുന്നിക്കോട്, പുനലൂർ, അഞ്ചൽ, ഏരൂർ, കടയ്ക്കൽ സ്റ്റേഷൻ പരിധികളിലായിരുന്നു പരിശോധന. പതിനൊന്ന് കേസുകൾ പൊലീസ് രജിസ്റ്റർ ചെയ്തു. രണ്ട് പ്രതികൾ പ്രായപൂർത്തിയാകാത്ത കുട്ടികളായിരുന്നു. ഇവരെ ജുവനൈൽ ബോർഡ് മുൻപാകെ ഹാജരാക്കി. കുണ്ടറ മുളവന കരിപ്പുറം കോട്ടൂരഴികത്ത് പുത്തൻ ബംഗ്ലാവിൽ സിനു മാമച്ചനെ (22) അറസ്റ്റ് ചെയ്ത് കോടതിയിൽ ഹാജരാക്കി. മറ്റുള്ളവരിൽ നിന്ന് മൊബൈൽ ഫോണുകളും ലാപ്‌ടോപ്പുകളും പിടിച്ചെടുത്ത് ഫോറൻസിക് ലാബിൽ പരിശോധനക്ക് അയച്ചു. ഫലം വരുന്നത് അനുസരിച്ച് കൂടുതൽ അറസ്റ്റുണ്ടാകും. കൊല്ലം റൂറൽ സൈബർ സെല്ലിന്റെയും സൈബർ ഡോമിന്റെയും നേതൃത്വത്തിലായിരുന്നു പരിശോധന.

''സൈബർ സെല്ലിന്റെയും സൈബർ ഡോമിന്റെയും നേതൃത്വത്തിൽ പരിശോധനകളും നടപടികളും തുടരും.

എസ്.ഹരിശങ്കർ, റൂറൽ എസ്.പി