തിരുവനന്തപുരം: പ്ലസ് വൺ രണ്ടാം അലോട്ടുമെന്റ് പ്രകാരമുള്ള വിദ്യാർത്ഥി പ്രവേശനം ഇന്ന് അവസാനിക്കും. മുഖ്യഘട്ടത്തിലെ അവസാന അലോട്ട്മെന്റായതിനാൽ അവസരം ലഭിച്ചവർ ഫീസടച്ച് സ്ഥിരപ്രവേശനം നേടണം. ആദ്യ അലോട്ട്മെന്റിൽ താത്കാലിക അഡ്മിഷൻ എടുത്തവരും രണ്ടാം അലോട്ട്മെന്റിൽ മാറ്റമൊന്നുമില്ലെങ്കിൽ ഇന്ന് വൈകിട്ട് അഞ്ചിനുള്ളിൽ സ്ഥിരപ്രവേശനം നേടണം. അലോട്ട്‌മെന്റ് ലഭിച്ചിട്ടും പ്രവേശനം നേടാത്തവരെയും പ്രവേശനം നേടിയ ശേഷം ടി.സി വാങ്ങിയവരെയും തുടർന്നുള്ള സപ്ലിമെന്ററി അലോട്ട്‌മെന്റിൽ പരിഗണിക്കില്ല.

രണ്ടാം അലോട്ട്മെന്റ് പ്രകാരമുള്ള പ്രവേശന നടപടികൾ പൂർത്തിയായ ശേഷമുള്ള സീറ്റൊഴിവ് വിവരം പത്തിന് രാവിലെ ഒമ്പതിന് www.hscap.kerala.gov.in ൽ പ്രസിദ്ധീകരിക്കും. ഇൗ സീറ്റുകളിലേക്ക് അന്ന് രാവിലെ ഒമ്പത് മുതൽ 14ന് വൈകിട്ട് അഞ്ച് വരെ സപ്ലിമെന്ററി അലോട്ട്മെന്റിനായി അപേക്ഷ സമർപ്പിക്കാം.

മുഖ്യ അലോട്ട്മെന്റിൽ അപേക്ഷിച്ചിട്ടും പ്രവേശനം ലഭിക്കാത്തവർ കാൻഡിഡേറ്റ് ലോഗിനിലെ ‘RENEW APPLICATION’ ലിങ്കിലൂടെ ഒഴിവുകൾക്കനുസൃതമായി പുതിയ ഒാപ്ഷൻ നൽകി അപേക്ഷ അന്തിമമായി സമർപ്പിക്കണം. ഇതുവരെ അപേക്ഷിക്കാൻ കഴിയാത്തവർ APPLY ONLINE-SWS ലിങ്കിലൂടെ അപേക്ഷ സമർപ്പിക്കണം. പ്രവേശനത്തിന്റെ തുടർപ്രവർത്തനങ്ങൾക്കായി ‘Create Candidate Login-SWS ലൂടെ കാൻഡിഡേറ്റ് ലോഗിൻ സൃഷ്ടിക്കണം. തെറ്റായ വിവരങ്ങൾ കാരണം അലോട്ട്മെന്റ് റദ്ദാക്കപ്പെട്ടവർ സപ്ലിമെന്ററി അലോട്ട്മെന്റിന് പരിഗണിക്കാനായി കാൻഡിഡേറ്റ് ലോഗിനിലെ ‘RENEW APPLICATION’ ലൂടെ പിഴവുകൾ തിരുത്തി ഒാപ്ഷനുകൾ നൽകി അപേക്ഷ സമർപ്പിക്കണം. ഒഴിവുള്ള സ്കൂളുകൾ/ വിഷയ കോമ്പിനേഷനുകൾ മാത്രമേ സപ്ലിമെന്ററി അലോട്ട്മെന്റിൽ ഒാപ്ഷനായി നൽകാനാവൂ. സ്പോർട്സ് ക്വോട്ടാ സപ്ലിമെന്ററി അലോട്ട്മെന്റിന് അപേക്ഷിക്കാനുള്ള സമയം ഇന്ന് വൈകിട്ട് നാലിന് അവസാനിക്കും. കൂടുതൽ വിവരങ്ങൾക്ക്: www.hscap.kerala.gov.in.