കിളിമാനൂർ:കിളിമാനൂർ ബ്ലോക്ക് പരിധിയിലെ കാട്ടുംപുറം പ്രാഥമികാരോ​ഗ്യകേന്ദ്രം, ചാലാംകോണം പ്രാഥമിക ആരോ​ഗ്യകേന്ദ്രം എന്നിവ ഇനിമുതൽ കുടുംബാരോ​ഗ്യകേന്ദ്രങ്ങൾ. ജില്ലയിൽ പ്രവർത്തന സജ്ജമായ പുതിയ 12 കുടുംബാരോ​ഗ്യകേന്ദ്രങ്ങളിൽ ഇടംപിടിച്ചാണ് രണ്ട് പ്രാഥമികാരോ​ഗ്യകേന്ദ്രങ്ങളും കുടുംബാരോ​ഗ്യകേന്ദ്രങ്ങളായി ഉയർത്തപ്പെട്ടത്. ഇരു കുടുംബാരോ​ഗ്യകേന്ദ്രങ്ങളുടെയും പ്രഖ്യാപനം മുഖ്യമന്ത്രി പിണറായി വിജയൻ വീഡിയോ കോൺഫറൻസിലൂടെ നിർവഹിച്ചു. മന്ത്രി കെ.കെ. ശൈലജ അദ്ധ്യക്ഷത വഹിച്ചു. പുളിമാത്ത് കുടുംബാരോ​ഗ്യകേന്ദ്രത്തിൽ നടന്ന ചടങ്ങിൽ ബി. സത്യൻ എം.എൽ.എ ശിലാഫലക അനാച്ഛാദനം നടത്തി. പുളിമാത്ത് പഞ്ചായത്ത് പ്രസിഡന്റ് ബി വിഷ്ണു അദ്ധ്യക്ഷത വഹിച്ചു. കുടുംബാരോ​ഗ്യകേന്ദ്രത്തിന് എം.എൽ.എ ഫണ്ടിൽ നിന്നു നിർമ്മിച്ച കെട്ടിടം ബി.സത്യൻ എം.എൽ.എ ഉദ്ഘാടനം ചെയ്തു. ബ്ലോക്ക് പഞ്ചായത്തം​ഗങ്ങളായ എസ്.യഹിയ, കെ. വത്സലകുമാർ തുടങ്ങിയവർ സംസാരിച്ചു. മെഡിക്കൽ ഓഫീസർ ഡോ.ജയസൂര്യ സ്വാ​ഗതം പറഞ്ഞു. മടവൂർ ചാലാംകോണം കുടുംബാരോ​ഗ്യകേന്ദ്രത്തിൽ നടന്ന ചടങ്ങിൽ വി .ജോയി എം.എൽ.എ ശിലാഫലക അനാച്ഛാദനം നിർവഹിച്ചു. മടവൂർ പഞ്ചായത്ത് പ്രസിഡന്റ് ​ഗിരിജാ ബാലചന്ദ്രൻ അദ്ധ്യക്ഷനായി. വൈസ് പ്രസിഡന്റ് ആർ .എസ് രജിത, ലീന , സജീന, മോഹൻദാസ്, നവാസ്, ജലജ, ദീപ, രജനി തുടങ്ങിയവർ സംസാരിച്ചു. മെഡിക്കൽ ഓഫീസർ സ്റ്റാൻസി സെബാസ്റ്റ്യൻ സ്വാ​ഗതം പറഞ്ഞു. രണ്ട് പി.എച്ച്.സികളും കുടുംബാരോ​ഗ്യകേന്ദ്രമായി ഉയർത്തപ്പെട്ടതോടെ ഇനിമുതൽ 3 സ്ഥിരം ഡോക്ടർമാരുടെ സേവനം ഇവിടെ ലഭ്യമാകും. ഒ.പി പ്രവർത്തനം ദിവസവും വൈകിട്ട് 6 വരെ ഉണ്ടാകും. ലാബ്,ഫാർമസി എന്നിവയുടെ സൗകര്യവും ലഭ്യമാകും. സാധാരണ രോ​ഗ​ങ്ങൾക്കുള്ള ചികിത്സയ്ക്ക് പുറമെ ജീവിതശൈലി രോ​​ഗ ക്ലിനിക്, വിഷാദരോ​ഗ ചികിത്സയ്ക്കുള്ള ക്ലിനിക്, പാലിയേറ്റീവ് പരിചരണം,സ്ത്രീകൾക്കും പെൺകുട്ടികൾക്കുമുള്ള ചികിത്സ എന്നിവയും ഉണ്ടാകും.