തിരുവനന്തപുരം: ഈ സാമ്പത്തിക വർഷം ആദ്യപാദം സംസ്ഥാനത്തെ മിക്ക പൊതുമേഖലാ സ്ഥാപനങ്ങളും നഷ്ടത്തിലായി. ഇവയുടെ പ്രകടനം വിലയിരുത്തുന്ന പബ്ലിക് സെക്ടർ റീസ്ട്രക്ചറിംഗ് ആൻഡ് ഇന്റേണൽ ഓഡിറ്ര് ബോ‌‌ർഡിന്റെ (റിയാബ് ) റിപ്പോർട്ട് വെളിച്ചം കണ്ടില്ല.

സംസ്ഥാനസർക്കാരി​ന്റെ 40 സ്ഥാപനങ്ങളിൽ കെ.എം.എം.എൽ, ടി.സി.സി, കുണ്ടറ കേരള സെറാമിക്സ്, ടൈറ്റാനിയം , കെ.എസ്.ഐ.ഡി.സി തുടങ്ങി ആറോ ഏഴോ സ്ഥാപനങ്ങൾ മാത്രമേ ഇക്കൊല്ലം ലാഭത്തിലാകാൻ സാദ്ധ്യതയുള്ളൂ.

കഴിഞ്ഞ വർഷം 19 എണ്ണം ലാഭത്തിലായിരുന്നു. കൂടുതൽ സ്ഥാപനങ്ങൾ ഈ പട്ടി​കയി​ൽ വരുമെന്ന പ്രതീക്ഷയ്ക്ക് തി​രി​ച്ചടി​യായി​ ഇത്. കൊവി​ഡി​ന് മുന്നേ തന്നെ നഷ്ടക്കണക്ക് വന്നതോടെ ശേഷം അത് രൂക്ഷമാകുമെന്ന് ഉറപ്പാണ്.

വർഷം ലാഭത്തിലായ സ്ഥാപനങ്ങൾ, ആകെ ലാഭം

2015-16- 8, 131.6 കോടി

2016-17- 13, 70 കോടി

2017-18- 14, 248.27 കോടി

2018-19- 13, 258.29

ലാഭം കാണിക്കുന്നതും കൃത്രിമത്തിലൂടെ

പലപ്പോഴും പൊതുമേഖലാ സ്ഥാപനങ്ങളുടെ ലാഭം കൂട്ടിക്കാണിക്കാനും നഷ്ടം മറയ്ക്കാനും കണക്കുകളിൽ കൃത്രിമം നടക്കാറുണ്ട്. ക്ലോസിംഗ് സ്റ്രോക്ക് കൂട്ടിക്കാണിക്കുക, റവന്യൂ ചെലവിനെ മൂലധന ചെലവാക്കുക, മാർച്ചിന് ശേഷം ഉള്ള ഡെലിവറി നേരത്തെയാക്കി​ കാണിക്കുക തുടങ്ങിയവയാണ് സാധാരണയായി ചെയ്യാറുള്ളത്.

 ഉത്തരവാദിത്തം ഉന്നതർക്ക്

പൊതുമേഖലയെ ലാഭത്തിലാക്കണമെന്ന് സ്ഥിരമായി പറയുമ്പോഴും ഇഷ്ടക്കാരെ ഉന്നത പദവികളിൽ എത്തിക്കുന്നതിന് മാത്രമാണ് രാഷ്ട്രീയ നേതൃത്വം താല്പര്യം കാണിക്കുന്നത്. പ്ലാൻ ഫണ്ടുകൾ എല്ലാവർക്കുമായി വീതിച്ചു നൽകുകയാണ് പതിവ്. വർഷം ഒന്നോ രണ്ടോ സ്ഥാപനങ്ങൾക്ക് മാത്രം വലി​യ ഫണ്ട് നൽകി​യാൽ ഇവയ്ക്ക് പുതി​യ പദ്ധതി​കൾ ആവി​ഷ്കരി​ക്കാനാകും.

ഏതെങ്കി​ലും സ്ഥാപനം വി​പുലീകരണ പദ്ധതി തയ്യാറാക്കിയാൽ കൃത്യ സമയത്ത് പണം നൽകില്ല. മി​ക്കവാറും നാലി​ലൊന്നു പോലും അനുവദി​ക്കുകയുമി​ല്ല. ഫണ്ട് മറ്റു ചെലവുകൾക്ക് വി​നി​യോഗി​ക്കപ്പെടും.

ഉടൻ പ്രസിദ്ധീകരിക്കും

ചില പൊതുമേഖലാ സ്ഥാപനങ്ങളിൽ നിന്നുള്ള കണക്കുകൾ കിട്ടാത്തതുകൊണ്ടാണ് റിപ്പോർട്ട് വൈകുന്നത്. ഇത് ഉടൻ തന്നെ പ്രസിദ്ധീകരിക്കും. ആകെയുള്ള 40 സ്ഥാപനങ്ങളിൽ 19 എണ്ണം വരെ ലാഭത്തിലായതാണ്. ഇത്തവണ പത്തിൽ താഴെ സ്ഥാപനങ്ങൾ മാത്രമേ ലാഭത്തിലായിട്ടുള്ളൂ. 26 എണ്ണമായി​രുന്നു ലക്ഷ്യം.

എൻ.ശശിധരൻ നായർ, ചെയർമാൻ, റിയാബ്