കിളിമാനൂർ: പഠിക്കാനും പോരാടാനും ഒപ്പം നെൽകൃഷിയിലും നൂറുമേനി വിളയിക്കാനാകുമെന്ന് തെളിയിച്ചിരിക്കുകയാണ് എസ്.എഫ്.ഐ കിളിമാനൂർ ഏരിയാ കമ്മറ്റി പ്രവർത്തകർ. എസ്.എഫ്.ഐ സംസ്ഥാനകമ്മറ്റിയുടെ സമൃദ്ധി പദ്ധതിയുടെ ഭാഗമായാണ് ഏരിയാകമ്മറ്റിയുടെ നേതൃത്വത്തിൽ വെള്ളല്ലൂർ ഏലായിൽ നെൽകൃഷി നടത്തിയത്. ഏതാണ്ട് ഒരേക്കറോളം സ്ഥലത്താണ് നെൽകൃഷി നടത്തിയത്. മികച്ച പരിചരണവും നല്കി. കൊയ്ത്ത് ഉത്സവം ജില്ലാപഞ്ചായത്ത് സ്റ്റാൻഡിംഗ് കമ്മറ്റി ചെയർമാൻ ബി.പി. മുരളി ഉദ്ഘാടനം ചെയ്തു. ഏരിയാ പ്രസിഡന്റ് അവിനാശ് നഗരൂർ അദ്ധ്യക്ഷനായി. എസ്.എഫ്.ഐ സംസ്ഥാനകമ്മിറ്റിയംഗം എ.ആർ. റിയാസ്, സി.പി.എം വെള്ളല്ലൂർ ലോക്കൽ സെക്രട്ടറി എസ്. സജ്ജനൻ, ഏരിയാ കമ്മിറ്റിയംഗങ്ങളായ സംഗീത്, വൈഷ്ണവ്, അജ്മൽ, അശ്വിൻ, രഞ്ചിത്ത്, ശ്രീതു, ശ്രുതി, ബാലസംഘം ഏരിയാ പ്രസിഡന്റ് നിമിഷ മോഹനൻ, അയ്യപ്പദാസ് തുടങ്ങിയവർ സംസാരിച്ചു.