കിളിമാനൂർ: സംസ്ഥാനത്താകെ അങ്കണവാടികൾ നാല്പത്തിയഞ്ചാം വാർഷികം ആഷോഷിക്കുമ്പോൾ കരുതലോടെ മാതൃകാ പ്രവർത്തനങ്ങളുമായി മുന്നോട്ട് പോകുകയാണ് അങ്കണവാടി ജീവനക്കാർ. കൂട്ടുകാരില്ലാതെ, കളി ചിരിയും കുസൃതികളും ഇല്ലാതെ ഇരിക്കുന്ന കുരുന്നുകളെ ഓൺലൈൻ വഴി ഉഷാറാക്കാൻ വിവിധ പദ്ധതികളുമായി അങ്കണവാടി പ്രവർത്തകർ രംഗത്ത്. കേരളത്തിലെ അങ്കണവാടികൾക്ക് 45 വയസ് തികയുന്നതിന്റെ ആഘോഷം കൂടിയാണ് പുതിയ പ്രവർത്തികളിലൂടെ നടത്തുന്നത്. കൊവിഡ് പശ്ചാത്തലത്തിലും അങ്കണവാടി കുട്ടികൾക്കുള്ള ഭക്ഷണ വിതരണം കൃത്യമായി ജില്ലയിൽ നടക്കുന്നുണ്ട്. ആദ്യ ഘട്ടത്തിൽ അതാത് സെക്ടറിലെ വർക്കർമാരും ഹെൽപ്പർമാരും നേരിട്ട് ആയിരുന്നു ഭക്ഷണ വിതരണം നടത്തിയത്.

 പ്രവർത്തനം

കുട്ടികളുടെ വിവിധ കലാപരിപാടികളുടെ വീഡിയോ, ഒരേ അങ്കണവാടിയിൽ മുത്തശ്ശി മുതൽ പേരക്കുട്ടി വരെ പഠിച്ച അനുഭവങ്ങൾ, ജില്ലയിലെ പ്രമുഖ വ്യക്തികളുടെ ആശംസകൾ, സിനിമ താരങ്ങളുടെ സംഭാഷണ പരിപാടികൾ എന്നിവയും തയ്യാറാക്കും. അങ്കണവാടി എന്റെ മലർവാടി എന്ന ഉപന്യാസ മത്സരവും നടത്തുന്നുണ്ട്. ഓൺലൈൻ ക്ലാസുകൾ കുട്ടികൾക്ക് രസകരമാക്കുകയാണ് ലക്ഷ്യം. ഓൺലൈൻ ക്ലാസുകൾ ഫലവത്താക്കാൻ ജില്ലയിലെ എല്ലാ അങ്കണവാടി അദ്ധ്യാപകർക്കും സ്മാർട്ട്‌ ഫോണുകൾ നൽകിയിട്ടുണ്ട്.

ജീവനക്കാരുടെ പ്രവർത്തനങ്ങൾ

കുട്ടികളുടെ വിവരങ്ങൾക്ക് പുറമേ ഗർഭിണികൾ, മുലയൂട്ടുന്ന അമ്മമാർ എന്നിവരുടെ വിവരങ്ങളും അപ്ഡേറ്റ് ചെയ്തു സാമൂഹ്യ ക്ഷേമ വകുപ്പിന് നൽകണം. മുലയൂട്ടുന്ന അമ്മമാർക്കും കൗമാരക്കാർക്കും മൂന്നു വയസിനു താഴെയുള്ള കുഞ്ഞുങ്ങൾക്കും പോഷകാഹാരങ്ങൾ വീട്ടിൽ എത്തിക്കുന്നുണ്ട്. ജില്ലാ വനിതാ ശിശു വികസന ഓഫീസറുടെ ഏകോപനത്തിൽ പ്രോഗ്രാം ഓഫീസർമാർ, സി.ഡി.പിമാർ, സൂപ്പർ വൈസർമാർ എന്നിവരാണ് ഈ പ്രവർത്തനങ്ങൾക്ക് മേൽനോട്ടം വഹിക്കുന്നത്. അങ്കണവാടികൾക്ക് അവധി നൽകിയ സാഹചര്യത്തിൽ കുട്ടികൾക്കാവശ്യമായ പോഷകാഹാരം ഉറപ്പ് വരുത്തുക എന്നതാണ് ലക്ഷ്യം.

കിളിക്കൊഞ്ചൽ

അങ്കണവാടി കുട്ടികൾക്ക് എല്ലാ ദിവസവും രാവിലെ 10നു വിക്‌ടേഴ്‌സ് ചാനലിൽ കിളിക്കൊഞ്ചൽ ക്ലാസുകൾ നടക്കും. ഓരോ തീം അനുസരിച്ചാണ് ക്ലാസുകൾ. ഇതിൽ കഥകൾ, പാട്ടുകൾ, കളികൾ എന്നിവ ഉണ്ടാകും. കൂടാതെ അതാതു സെക്ടറുകളിലെ അദ്ധ്യാപകരുടെ ഓൺലൈൻ ക്ലാസുകളുമുണ്ട്. കുട്ടികളുടെ വീഡിയോകൾ അദ്ധ്യാപകർ ഗ്രൂപ്പിൽ ഷെയർ ചെയ്യും.

ഭക്ഷണ ക്രമം

പ്രീ സ്കൂൾ കുട്ടികൾക്ക് അമൃതം പൊടി, അരി, നുറുക്ക് ഗോതമ്പ്, ശർക്കര, എള്ള്, പൊട്ടുകടല, ചെറുപയർ, വെളിച്ചെണ്ണ. 3 വയസിനു താഴെ കുട്ടികൾക്ക് അമൃതം പൊടി ഗർഭിണികൾക്ക് നുറുക്ക് ഗോതമ്പ്, ശർക്കര, എള്ള്, പൊട്ടുകടല, ചെറുപയർ, വെളിച്ചെണ്ണ മുലയൂട്ടുന്ന അമ്മമാർക്ക് നുറുക്ക് ഗോതമ്പ്, ശർക്കര, എള്ള്, പൊട്ടുകടല, ചെറുപയർ, വെളിച്ചെണ്ണ.

കൊവിഡിലും അങ്കണവാണികളുടെ പ്രവർത്തനം ഊർജ്ജിതമായാണ് നടക്കുന്നത്. കുട്ടികൾക്കും ഗർഭിണികൾക്കും മുലയൂട്ടുന്ന അമ്മമാർക്കും പോഷകാഹാരം നൽകുന്നതിന് മുടക്കം വരുത്തിയിട്ടില്ല. കിളിക്കൊഞ്ചൽ കൂടാതെ കുട്ടികൾക്ക് ഓൺലൈൻ ക്ലാസും നൽകുന്നുണ്ട്.

ഫസീല, സി.ഡി.പി