ലോക്ക്ഡൗൺ ചലഞ്ചുകളുടെ കാലം കൂടിയായിരുന്നു. വ്യത്യസ്തമായ ചലഞ്ചുകളുമായി നിരവധി താരങ്ങൾ എത്തിയിരുന്നു. അവയിൽ തെന്നിന്ത്യൻ താരങ്ങൾ ഏറ്റെടുത്ത ഏറെ ശ്രദ്ധിക്കപ്പെട്ട ഒന്നായിരുന്നു ഗ്രീൻ ചലഞ്ച്. തമിഴകത്തു നിന്നും വിജയ്, സൂര്യ, പ്രകാശ് രാജ്, തൃഷ, തെലുങ്ക് താരം മഹേഷ് ബാബു, നടി ശ്രുതി ഹാസൻ തുടങ്ങിയവരെല്ലാം ചലഞ്ച് ഏറ്റെടുക്കുകയും വീടുകളിൽ മരങ്ങൾ നടുന്നതിന്റെ ചിത്രങ്ങൾ സമൂഹമാദ്ധ്യമങ്ങളിൽ പങ്കുവയ്ക്കുകയും ചെയ്തിരുന്നു. മലയാളത്തിൽ നിന്നും നടി രജിഷ വിജയനും ഇപ്പോൾ ഗ്രീൻ ചലഞ്ച് ഏറ്റെടുക്കുകയാണ്. തന്റെ ഫ്ളാറ്റിന്റെ ബാൽക്കണിയിൽ ഒരു സപ്പോട്ട മരം നട്ടിരിക്കുകയാണ് താരം. സാധാരണ ചെടികൾക്കും പച്ചക്കറികൾക്കുമൊക്കെ ഇടം നൽകാറുള്ള ബാൽക്കണിയിൽ ഒരു സപ്പോട്ട മരം എങ്ങനെ വളർത്തിയെടുക്കാം എന്നത് ഒരു വെല്ലുവിളിയായി തന്നെ സ്വീകരിച്ചിരിക്കുകയാണ് താരം. 'അനുരാഗ കരിക്കിൻ വെള്ളം' എന്ന ചിത്രത്തിലൂടെ 'എലി' എന്ന കഥാപാത്രമായി മലയാളികളുടെ ഹൃദയം കവർന്ന നടിയാണ് രജിഷ വിജയൻ. ആദ്യ ചിത്രത്തിലൂടെ മികച്ച നടിക്കുള്ള സംസ്ഥാന സർക്കാരിന്റെ പുരസ്കാരവും രജിഷ സ്വന്തമാക്കിയിരുന്നു.കഴിഞ്ഞ വർഷം ജൂൺ, ഫൈനൽസ്, സ്റ്റാൻഡ് അപ്പ് എന്നീ ചിത്രങ്ങളിലെല്ലാം ശ്രദ്ധേയമായ അഭിനയമാണ് രജിഷ കാഴ്ച വച്ചത്.