നെടുമങ്ങാട് : നിരവധി മോഷണ കേസ്സുകളിലെ പ്രതികളായ രണ്ടുപേർ നെടുമങ്ങാട് പൊലീസിന്റെ പിടിയിൽ. ആനാട് പുല്ലേക്കോണം പുതുവൽ പുത്തൻവീട്ടിൽ ജോണി എന്നു വിളിക്കുന്ന ജോൺസൺ (23), അരശുപറമ്പ് തച്ചരുകോണത്തു നിന്നും ആനാട് ഇരിഞ്ചയം വേട്ടമ്പള്ളി താമരക്കുളം കുന്നുംപുറത്ത് വീട്ടിൽ വാടകയ്ക്ക് താമസിക്കുന്ന ജിബിൻ(25 )എന്നിവരാണ് പിടിയിലായത്. കഴിഞ്ഞ ആഴ്ച കരുപ്പൂര് സ്വദേശി രാജേശ്വരിയുടെ വീടിന്റെ പിൻഭാഗത്ത് വെന്റിലേഷന് പകരമായി ഇട്ടിരുന്ന ടാർപ്പോളിൻ പൊളിച്ച് അകത്തു കയറി വീട്ടിൽ സൂക്ഷിച്ചിരുന്ന ടിവിയും മിക്സിയും വെങ്കലപാത്രങ്ങളും മോഷ്ടിച്ചെന്ന പരാതിയിലാണ് പിടിയിലായത്.

ജോലി സംബന്ധമായി തിരുവനന്തപുരത്തായിരുന്ന രാജേശ്വരി മാസത്തിൽ ഒരു പ്രാവശ്യമാണ് വീട്ടിൽ വരാറുള്ളത്. കഴിഞ്ഞ 12ന് വീട്ടിൽ വന്നപ്പോഴാണ് മോഷണവിവരം അറിയുന്നത്. ഇവരുടെ പരാതിയിന്മേൽ പൊലീസ് നടത്തിയ അന്വേഷണത്തിലാണ് പ്രതികൾ പിടിയിലായത്. ഇരുവരും നിരവധി മോഷണക്കേസുകളിലെ പ്രതികളാണെന്ന് ഇൻസ്‌പെക്ടർ വി. രാജേഷ് കുമാർ പറഞ്ഞു. എസ്.ഐമാരായ സുനിൽ ഗോപി, ഷിഹാബൂദ്ദീൻ സീനിയർ സിവിൽ പൊലീസ് ഓഫീസർമാരായ ഹരി, സഫീർ എസ്.സി.പി.ഒ ബിജു എന്നിവർ ചേർന്നാണ് പിടികൂടിയത്. കോടതിയിൽ ഹാജരാക്കി റിമാഡ് ചെയ്‌ത പ്രതികളെ കസ്റ്റഡിയിൽ വാങ്ങി കൂടുതൽ അന്വേഷണം നടത്തുമെന്ന് നെടുമങ്ങാട് പൊലീസ് അറിയിച്ചു.