കൊച്ചി: ഫലപ്രദമായ ദുരന്തനിവാരണത്തിനും ലഘൂകരണത്തിനും സമൂഹത്തെ ശാക്തീകരിക്കേണ്ടത് നിർണായകമാണെന്ന് വിദഗ്ദ്ധ അഭിപ്രായം. ചെന്നൈയിലെ യുഎസ് കോൺസുലേ​റ്റ് ജനറലും സെന്റർ ഫോർ പബ്ലിക് പോളിസി റിസർച്ചും (സി.പി.പി.ആർ) ചേർന്ന് സംഘടിപ്പിച്ച ഓൺലൈൻ പരിപാടിയിൽ 'ദുരന്തങ്ങൾ തയ്യാറെടുപ്പും നേരിടലും സമൂഹത്തിന് ഒരു കൈപുസ്തകം പ്രകാശനം ചെയ്ത് ചടങ്ങിലാണ് ഈ മേഖലയുമായി ബന്ധപ്പെട്ടവർ ഇക്കാര്യം വ്യക്തമാക്കിയത്.

'അമേരിക്ക വിത്ത് കേരള' പദ്ധതിയുടെ പ്രധാന ഫലമാണ് ഈ കൈപുസ്തകമെന്നും യു.എസ് -ഇന്ത്യ ബന്ധവും, ദുരന്തനിവാരണ മേഖലയിലെ സഹകരണവും മുന്നോട്ട് കൊണ്ടുപോകാൻ ഇത് സഹായിക്കുമെന്നും യു.എസ് കോൺസുലേ​റ്റ് ജനറൽ പബ്ലിക് അഫയേഴ്‌സ് ഓഫീസർ ആൻ ലീ ശേഷാദ്റി പറഞ്ഞു. 2019 ജൂൺ മുതൽ ഒക്ടോബർ വരെ ദുരന്തതയ്യാറെടുപ്പുകളും കൈകാര്യം ചെയ്യലും, എന്നീ ആശയങ്ങൾ കേന്ദ്രീകരിച്ച് നടത്തിയ വിവിധ ശില്പശാലകളിൽ നിന്നും ബോധവത്കരണ പരിപാടികളിൽ നിന്നുമുള്ള ആശയങ്ങളും നിർദേശങ്ങളും ഉൾക്കൊള്ളിച്ചാണ് ഈ പുസ്തകം തയാറാക്കിയിരിക്കുന്നത്. പുസ്തകത്തിന്റെ ഇംഗ്ലീഷ്, മലയാളം പതിപ്പുകൾ സി.പി.പി.ആർ വെബ്‌സൈ​റ്റിൽ ലഭ്യമാണ്.

പുസ്തകപ്രകാശനത്തെ തുടർന്ന് 'സമൂഹ കേന്ദ്രീകൃതമായ ദുരന്ത ലഘൂകരണ പ്രക്രിയയിൽ ബഹുവിധ ദുരന്ത സമീപനത്തിന്റെ ആവശ്യകത' എന്ന വിഷയത്തിൽ നടന്ന പാനൽ ചർച്ച സി.പി.പി.ആർ ചെയർമാൻ ഡോ. ഡി ധനുരാജ് മോഡറേ​റ്റ് ചെയ്തു. ഐക്യരാഷ്ട്ര പരിസ്ഥിതി പദ്ധതിയുടെ ദുരന്തസാദ്ധ്യത ലഘൂകരണ മേധാവി ഡോ മുരളി തുമ്മാരുകുടി, കേരള സെന്റർ ഫോർ മി​റ്റിഗേഷൻ ആൻഡ് ഇൻക്ലൂസിവ് ഡവലപ്‌മെന്റ് ഡയറക്ടർ ബോർഡ് ഓണററി ചെയർപേഴ്‌സൺ ഡോ. നിവേദിത പി ഹരൻ, കെ.എസ്.ഡി.എം.എ സെക്രട്ടറി ഡോ. ശേഖർ കുര്യാക്കോസ്,വാഷിംഗ്ടൺ സർവകലാശാലയിലെ ഇൻസ്​റ്റി​റ്റ്യൂട്ട് ഫോർ ഹസാഡ് മി​റ്റിഗേഷൻ ആൻഡ് പ്ലാനിംഗ് സഹഡയറക്ടർ ഡോ. ഹിമാൻഷു ഗ്രോവർ എന്നിവർ സംസാരിച്ചു.