തിരുവനന്തപുരം: കമ്മ്യൂണിസ്റ്റ് പാർട്ടി ഒഫ് ഇന്ത്യ രൂപീകരണത്തിന്റെ നൂറാം വാർഷികം സി.പി.എമ്മിന്റെ നേതൃത്വത്തിൽ സംസ്ഥാനത്ത് വിപുലമായി ആഘോഷിച്ചു. ഇന്നലെ അര ലക്ഷത്തിലേറെ കേന്ദ്രങ്ങളിൽ പ്രവർത്തകർ പതാക ഉയർത്തി. ബ്രാഞ്ച്, വാർഡ് കേന്ദ്രങ്ങൾ, പാർട്ടി ഓഫീസുകൾ, പ്രധാന സ്ഥലങ്ങൾ, രക്തസാക്ഷി സ്മാരകങ്ങൾ, സ്മൃതി മണ്ഡപങ്ങൾ, തൊഴിലിടങ്ങൾ എന്നിവിടങ്ങളിലെല്ലാം പതാക ഉയർത്തി.
ഓൺലൈൻ പ്രഭാഷണങ്ങൾ, പ്രദർശനങ്ങൾ, ഡോക്യുമെന്ററി പ്രദർശനം, പഠന ക്ലാസുകൾ, ലഘുലേഖ വിതരണം എന്നിവയും ലോക്കൽ അടിസ്ഥാനത്തിൽ സംഘടിപ്പിച്ചു.
തിരുവനന്തപുരത്ത് എ.കെ.ജി സെന്ററിന് മുന്നിൽ സി.പി.എം കേന്ദ്രകമ്മിറ്റി അംഗം എം.വി. ഗോവിന്ദൻ പതാക ഉയർത്തി. സംസ്ഥാനതല ഉദ്ഘാടനം വൈകിട്ട് ആറിന് ജനറൽ സെക്രട്ടറി സീതാറാം യെച്ചൂരി വീഡിയോ കോൺഫറൻസിലൂടെ നിർവഹിച്ചു. അടുത്ത ദിവസങ്ങളിൽ ജില്ലാ കമ്മിറ്റികൾ വിവിധ പരിപാടികൾ സംഘടിപ്പിക്കും.

വാർഷികാഘോഷത്തിന്റെ ഭാഗമായി ദേശീയ തലത്തിലും വിവിധ സംസ്ഥാനങ്ങളിലും പരിപാടികൾ സംഘടിപ്പിച്ചിട്ടുണ്ട്. തമിഴ്നാട്, ആന്ധ്ര, തെലങ്കാന, കർണാടക, മഹാരാഷ്ട്ര, ഒഡിഷ, രാജസ്ഥാൻ, പഞ്ചാബ്, ഡൽഹി, യു.പി, ബംഗാൾ, ത്രിപുര, ഹിമാചൽ പ്രദേശ് സംസ്ഥാനങ്ങളിൽ ഒരാഴ്ചയായി ആഘോഷം നടന്നുവരുന്നു.