തിരുവനന്തപുരം: ഇരുചക്ര വാഹനങ്ങളിൽ പിന്നിലിരിക്കുന്നയാൾക്ക് ഹെൽമെറ്റ് ഇല്ലെങ്കിലും വാഹനമോടിക്കുന്നയാളിന്റെ ഡ്രൈവിംഗ് ലൈസൻസ് നഷ്ടമാകും. കേന്ദ്ര മോട്ടോർവാഹന നിയമത്തിലെ പുതിയ ഭേദഗതിപ്രകാരം ലൈസൻസിന് അയോഗ്യത കൽപിക്കാനുള്ള അധികാരം ഉദ്യോഗസ്ഥർക്കുണ്ടെന്ന് ട്രാൻസ്‌പോർട്ട് കമ്മിഷണർ എം.ആർ അജിത്കുമാർ അറിയിച്ചു.
കേന്ദ്രനിയമത്തിലെ 1000 രൂപ പിഴ 500 രൂപയായി സംസ്ഥാനം കുറച്ചിരുന്നു. എന്നാൽ മൂന്നുമാസത്തേയ്ക്ക് ലൈസൻസ് സസ്‌പെൻഡ് ചെയ്യാനുള്ള വ്യവസ്ഥ പിൻവലിച്ചിട്ടില്ല. പിഴ അടച്ചാലും ലൈസൻസ് സസ്‌പെൻഡ് ചെയ്യാനും, ഡ്രൈവർ റിഫ്രഷർ കോഴ്സിന് അയയ്ക്കാനും, കഴിയും. ഈ വ്യവസ്ഥകൾ മലപ്പുറത്തെ പെരിന്തൽമണ്ണയിൽ നടപ്പാക്കിയപ്പോൾ ഹെൽമെറ്റ് ഉപയോഗിക്കുന്നവരുടെ എണ്ണം വർദ്ധിക്കുകയും അപകട മരണ നിരക്ക് 40 ശതമാനം കുറയുകയും ചെയ്തുവെന്ന് ട്രാൻസ്‌പോർട്ട് കമ്മിഷണർ അറിയിച്ചു.