തിരൂർ: മുന്നാക്കക്കാർക്ക് 10 ശതമാനം സാമ്പത്തിക സംവരണം നൽകി സി.പി.എം നടപ്പാക്കുന്നത് ആർ.എസ്.എസ് അജണ്ടയാണെന്ന് കെ.പി.സി.സി ഒ.ബി.സി ഡിപ്പാർട്ട്‌മെന്റ് സംസ്ഥാന ചെയർമാൻ സുമേഷ് അച്യുതൻ പറഞ്ഞു. തിരൂരിൽ നടന്ന കെ.പി.സി.സി ഒ.ബി.സി ഡിപ്പാർട്ട്‌മെന്റ് മലപ്പുറം ജില്ലാ കമ്മിറ്റി യോഗം ഉദ്ഘാടനം ചെയ്യുകയായിരുന്നു അദ്ദേഹം. ആർ.എസ്.എസിനെ പ്രീതിപ്പെടുത്താനാണ് എ.വിജയരാഘവൻ ഈ വിഷയത്തിൽ പി.കെ. കുഞ്ഞാലിക്കുട്ടിയെ കടന്നാക്രമിക്കുന്നത്. സമൂഹത്തിൽ മുസ്ലിം വിരുദ്ധതയുണ്ടാക്കുകയെന്ന ആർ.എസ്.എസ് നീക്കത്തിന് ചൂട്ടു പിടിക്കലാണ് എ. വിജയരാഘവന്റെ ലക്ഷ്യം. മുന്നാക്ക സംവരണ വിഷയം ഭരണഘടനാ വിരുദ്ധ വിഷയമാണ്. ഭരണഘടനയെ അട്ടിമറിച്ച് സംവരണതത്വത്തിൽ വെള്ളം ചേർക്കുന്ന കേന്ദ്ര,​ സംസ്ഥാന സർക്കാരുകൾക്കെതിരെ സമരം നടത്തുമെന്നും സുമേഷ് അച്യുതൻ പറഞ്ഞു. ജില്ലാ ചെയർമാൻ അനിൽ തലപ്പളളി അദ്ധ്യക്ഷനായി. സംസ്ഥാന ജനറൽ സെക്രട്ടറിമാരായ ബാബു നാസർ, മുജീബ് ആനക്കയം, മനമ്മൽ ബാബു, യൂത്ത് കോൺഗ്രസ് സംസ്ഥാന സെക്രട്ടറി സജേഷ് ചന്ദ്രൻ, ജില്ലാ ഭാരവാഹികളായ ആലി ആപ്പു, ഇ.പ്രസന്നൻ, അലി ആസാദ് തുടങ്ങിയവർ സംസാരിച്ചു.