തിരുവനന്തപുരം: നാൽപ്പത്തിനാലാമത് വയലാർ രാമവർമ്മ സാഹിത്യ അവാർഡ് ഗവർണർ ആരിഫ് മുഹമ്മദ് ഖാൻ കവി ഏഴാച്ചേരി രാമചന്ദ്രന് സമർപ്പിച്ചു. 'ഒരു വെർജീനിയൻ വെയിൽകാലം' എന്ന കൃതിയാണ് അവാർഡിനർഹമായത്. ഒരു ലക്ഷം രൂപയും പ്രശസ്ത ശിൽപ്പി കാനായി കുഞ്ഞിരാമൻ വെങ്കലത്തിൽ തീർത്ത ശില്പവുമാണ് അവാർഡ്.

രാജ്ഭവനിൽ നടന്ന ചടങ്ങിൽ വയലാർ രാമവർമ്മ മെമ്മോറിയിൽ ട്രസ്റ്റ് സെക്രട്ടറി സി.വി ത്രിവിക്രമനെ ഗവർണർ പൊന്നാട അണിയിച്ച് ആദരിച്ചു. ട്രസ്റ്റ് പ്രസിഡന്റ് പെരുമ്പടവം ശ്രീധരൻ അവാർഡ് ജേതാവിനെ ക്ഷണിച്ചു. ട്രസ്റ്ര് ഭാരവാഹികളായ കവി പ്രഭാവർമ്മ,​ പ്രൊഫ. ജി. ബാലചന്ദ്രൻ,​ ബി. സതീശൻ എന്നിവർ സംബന്ധിച്ചു.

പുരസ്‌കാര സമർപ്പണത്തോടനുബന്ധിച്ചു വയലാർ ഗാനസന്ധ്യയും നടന്നു.
കൊവിഡ് നിയന്ത്രണങ്ങൾ കണക്കിലെടുത്ത് ഓൺലൈൻ സംവിധാനങ്ങൾ ഉപയോഗിച്ചായിരുന്നു പരിപാടി. ഫേസ്ബുക്ക്, യൂട്യൂബ് പേജുകളിലൂടെ ഗാനസന്ധ്യ തത്സമയം ആളുകൾക്ക് കാണാനായി.