തിരുവനന്തപുരം: സേവ് ദ ഡേറ്റ് ഫോട്ടോഷൂട്ടിന് ആദ്യമായി കെ.എസ്.ആർ.ടി.സി ഡബിൾ ഡക്കർ വേദിയായി. 2021 ജനുവരി 18ന് വിവാഹം നിശ്ചയിച്ച വാമനപുരം സ്വദേശി ഗണേഷും ഈഞ്ചയ്‌ക്കൽ സ്വദേശി ലക്ഷ്‌മിയുമാണ് ആദ്യ ഫോട്ടോഷൂട്ട് നടത്തിയത്. വിവാഹത്തിനുമുമ്പും ശേഷവുമുള്ള ഫോട്ടോഷൂട്ടിന് ഡബിൾ ഡക്കർ ബസ് വിട്ടുനൽകുമെന്ന് 19ന് കേരളകൗമുദി റിപ്പോർട്ട് ചെയ്‌തിരുന്നു. എട്ട് മണിക്കൂറിന് 4000 രൂപ വാടക നൽകി 50 കിലോമീറ്റർ ദൂരത്തിൽ ഈ സർവീസ് ഉപയോഗപ്പെടുത്താനാകും. അധികമുള്ള കിലോമീറ്ററുകൾക്ക് അധിക വാടകകൂടി നൽകണം. ഡിസംബർ വരെയാണ് ഈ ഡിസ്‌കൗണ്ട് നിരക്ക് നിശ്ചയിച്ചിരിക്കുന്നത്. ഏജന്റുമാർക്കും ബുക്ക് ചെയ്യുന്നവർക്കും പ്രത്യേക കമ്മിഷൻ വ്യവസ്ഥയിൽ പദ്ധതി നടപ്പിലാക്കുന്നുണ്ട്. കെ.എസ്.ആർ.ടി.സിയുടെ ടിക്കറ്റ് ഇതര വരുമാന വർദ്ധനവിന് വേണ്ടിയാണ് ഇത്തരം പദ്ധതി കെ.എസ്.ആർ.ടി.സി ആവിഷ്‌കരിച്ച് നടപ്പിലാക്കിയത്. ഈ ബസിൽ വിവാഹ പ്രീവെഡിംഗ്, പോസ്റ്റ് വെഡിംഗ് ഷൂട്ടുകൾക്കും, ബർത്ത്ഡേ ഉൾപ്പെടെയുള്ള പാർട്ടികൾക്കും വാടകയ്‌ക്ക് നൽകും. ബസിന്റെ രണ്ടാം നിലയിൽ ആഘോഷങ്ങൾക്കും താഴത്തെ നിലയിൽ കുടുംബങ്ങളോടൊപ്പമുള്ള യാത്രയ്ക്കുമാണ് അവസരം. ലണ്ടനിലെ ആഫ്ടർ നൂൺ ടീ ബസ് ടൂറിന്റെ മാതൃകയിലാണ് കെ.എസ്.ആർ.ടി.സി പദ്ധതി നടപ്പാക്കുന്നത്. തിരുവനന്തപുരത്ത് ഇതിനകം നിരവധി ഏജൻസികൾ ഫോട്ടോ ഷൂട്ടിന് വേണ്ടി ബസ് ബുക്ക് ചെയ്‌ത് കഴിഞ്ഞു. വിജയകരമാകുന്ന മുറയ്‌ക്ക് കൊച്ചിയിലും കോഴിക്കോട്ടും കെ.എസ്.ആർ.ടി.സി പദ്ധതി ആരംഭിക്കും.