അമ്പലപ്പുഴ: തങ്ങളുടെ ആവശ്യത്തി​നു മുന്നി​ൽ ചെറുവി​രലനക്കാതെ നി​ന്ന അധി​കൃതരോട്, സ്വന്തമായി​ പാലം പണി​ത് നാട്ടുകാരുടെ മധുരപ്രതി​കാരം. തകഴി പഞ്ചായത്തിലെ മൂന്നാം വാർഡിനെയും അഞ്ചാം വാർഡിനെയും ബന്ധിപ്പിക്കുന അങ്കണവാടി പാലമാണ് ജനകീയ പങ്കാളിത്തത്തോടെ പൂർത്തീകരി​ച്ചത്. 25 ദിവസം കൊണ്ട് രണ്ടര ലക്ഷം രൂപ ചിലവിൽ പ്രദേശവാസികളുടെയും അഭ്യുദയകാംക്ഷികളുടെയും സഹായത്താലായി​രുന്നു പാലം നി​ർമ്മാണം.

നേരെത്തെ സ്ഥിതി ചെയ്തിരുന്ന പാലം ജീർണാവസ്ഥയി​ലായതോടെയാണ് പുതി​യ പാലമെന്ന ആവശ്യവുമായി​ നാട്ടുകാർ പഞ്ചായത്തി​നും മറ്റ് ജനപ്രതി​നി​ധി​കൾക്കും മുന്നി​ലെത്തി​യത്. 107-ാം നമ്പർ അങ്കണവാടി ,ചെമ്പകശ്ശേരി ക്ഷേത്രം ,796-ാം നമ്പർ എൻ .എസ്.എസ് കരയോഗം , തകഴി ഗവ.സ്കൂൾ ,ചിറയകം ,തെന്നടി എന്നിവി​ടങ്ങളിലേക്ക് ദി​നംപ്രതി​ നൂറ് കണക്കിന് ആളുകൾ ഈ പാലം വഴിയാണ് യാത്ര ചെയ്തിരുന്നത് . രോഗികളെ കൊണ്ടുപോകാൻ വാഹന സൗകര്യമില്ലാത്തതിനാൽ മരണം വരെ സംഭവിച്ചിട്ടുണ്ട് . വാഹനങ്ങൾ പാലത്തിൽ കയറ്റിക്കൊണ്ടുപോകാൻ സാധിക്കാത്തതിനാൽ രോഗികളെയും വൃദ്ധ ജനങ്ങളെയും എടുത്താണ് റോഡിൽ എത്തിച്ചിരുന്നത്. പഞ്ചായത്തുമായി ബന്ധപ്പെട്ടപ്പോൾ ഇടത്തോടുകളുമായി ബന്ധിപ്പിക്കുന്നതിനുള്ള പാലത്തിന് തുക അനുവദിക്കാൻ കാലതാമസം ഉണ്ടെന്നാണ് അറിയിച്ചത്. തുടർന്ന് നാട്ടുകാർ മുന്നി​ട്ടി​റങ്ങുകയായി​രുന്നു.

ഏഴംഗകമ്മി​റ്റി​,ഒറ്റത്തീരുമാനം

ജീർണാവസ്ഥയിലുള്ള പാലത്തിലൂടെ സഞ്ചരിക്കാൻ യാതൊരു നിവൃത്തി​യുമി​ല്ലാതെ വന്നതോടെയാണ് അങ്കണവാടി പാലം ജനകീയ പങ്കാളിത്തത്തോടെ പുനർനിർമ്മിക്കാനുള്ള തീരുമാനം പ്രദേശവാസികൾ കൈക്കൊണ്ടത് .ഇതി​നായി​ ഏഴംഗങ്ങൾ ഉൾപ്പെടുന്ന ഒരു കമ്മി​റ്റി രൂപീകരിച്ചു. ജനകീയ പങ്കാളിത്തത്തോടെ പാലം പുനർനിർമ്മിക്കുന്നതിനുള്ള തീരുമാനം പഞ്ചായത്തിനെ അറിയിച്ചശേഷം പണി​തുടങ്ങി​. മൂന്നേകാൽ മീറ്റർ വീതിയിൽ എട്ട് ഇഞ്ച് ഘനത്തിൽ ഒരു ആംബുലൻസ് കടന്നുപോകുന്ന രീതിയിലാണ് പാലം നിർമ്മിച്ചത്.

തുക തി​കയാഞ്ഞപ്പോൾ കടം വാങ്ങി​

കൊല്ലംമുക്ക് ജംഗ്ഷനിൽ നിലനിന്നിരുന്ന പഴയ വലി​യ പാലം പൊളിച്ച് കല്ലുകൾ എടുക്കുന്നതിന് പഞ്ചായത്തിൽ അപേക്ഷ നൽകി​. ഭരണാനുമതി ലഭിച്ചതിനെത്തുടർന്ന് , ഈ കല്ലുകൾ ഉപയോഗിച്ചാണ് പുതുതായി നിർമ്മിച്ച അങ്കണവാടി പാലത്തിന്റെ പിച്ചിംഗ് കെട്ടിയത് . വേണ്ടത്ര തുക ലഭിക്കാത്തതിനാൽ 50,000 രൂപ കടം എടുത്താണ് പാലം പണി പൂർത്തീകരിച്ചത് . കടം തീർക്കുന്നതിനായി കൈത്താങ്ങ് എന്ന് നിലയിൽ പഞ്ചായത്തിൽ നിന്നും ഒരു തുക ലഭിക്കും എന്ന പ്രതീക്ഷയിലാണ് കമ്മി​റ്റിക്കാർ . പാലത്തിന് വേണ്ടി സഹകരിച്ച എല്ലാ പ്രദേശവാസികൾക്കും കമ്മി​റ്റി​ പ്രസിഡന്റ് സനൽ കുമാർ ,സെക്രട്ടറി മധുസുദനൻ നായർ , ബിനീഷ് എന്നിവർ നന്ദി അറിയിച്ചു.