ആലപ്പുഴ: അമ്പലപ്പുഴ ഗവ. മോഡൽ ഹയർ സെക്കൻഡറി സ്‌കൂൾ ഓഡിറ്റോറിയത്തിൽ സജ്ജമാക്കിയ എക്കോ പ്രിവന്റീവ് ശബ്ദ സംവിധാനത്തിന്റെയും ഡിജിറ്റൽ സംവിധാനത്തിന്റെയും ഉദ്ഘാടനം മന്ത്രി ജി.സുധാകരൻ നിർവഹിച്ചു. ഓഡിറ്റോറിയത്തിനുള്ളിൽ ശബ്ദത്തിന്റെ മനോഹാരിത ഒട്ടും നഷ്ടപ്പെടാതെ എത്തിക്കുന്ന സംവിധാനമാണ് എക്കോ പ്രിവന്റീവ് സാങ്കേതിക വിദ്യ. മന്ത്രിയുടെ ആസ്തി വികസന ഫണ്ടിൽ നിന്നു 36.81 ലക്ഷം എക്കോ പ്രിവന്റീവ് സാങ്കേതിക വിദ്യ ഒരുക്കാനും 5.84 ലക്ഷം ഡിജിറ്റൽ സംവിധാനത്തിനും ചിലവഴിച്ചു. അമ്പലപ്പുഴ തെക്ക് പഞ്ചായത്ത് പ്രസിഡന്റ് ജി. വേണുലാൽ, ഗ്രാമപഞ്ചായത്ത് അംഗം സുഷമ രാജീവ്, സ്‌കൂൾ ഹെഡ്മിസ്ട്രസ് മിനി, പി.ടി.എ പ്രസിഡന്റ് നെസർ അമ്പലപ്പുഴ തുടങ്ങിയവർ പങ്കെടുത്തു.