ക്ഷേത്രം നൽകിയ ഭൂമിയിൽ ആശുപത്രി നിർമ്മിക്കാൻ പഞ്ചായത്തു കമ്മി​റ്റി തീരുമാനം

ചേർത്തല:കടക്കരപ്പള്ളി ഗവ.ഹോമിയോ ആശുപത്രിക്ക് സ്വന്തം മന്ദിരം നിർമ്മിക്കുന്നതിനായി കണ്ടമംഗലം ക്ഷേത്ര സമിതി സൗജന്യമായി നൽകിയ ഭൂമിയിൽ കെട്ടിട നിർമ്മാണം നടത്താൻ ഗ്രാമപഞ്ചായത്ത് കമ്മി​റ്റി അംഗീകാരം.ബുധനാഴ്ച നടന്ന പഞ്ചായത്ത് കമ്മി​റ്റിയിലാണ് തീരുമാനം. തങ്കി സഹകരണബാങ്കിന്റെ കെട്ടിടത്തിലെ മുറിയിലാണ് ആശുപത്രി പ്രവർത്തിച്ചിരുന്നത്. കെട്ടിടംനിർമ്മിക്കുന്നതിന് വകുപ്പു ഫണ്ടോ മന്ത്റി പി.തിലോത്തമന്റെ ആസ്തി വികസനഫണ്ടോ ആവശ്യപ്പെടാനും പഞ്ചായത്ത് കമ്മിറ്റി തീരുമാനിച്ചു.
കൈമാറുന്ന സ്ഥലത്തിന്റെ രേഖകൾ ക്ഷേത്രസമിതി പ്രസിഡന്റ് പി.ഡി.ഗഗാറിനിൽ നിന്നും ഗ്രാമപഞ്ചായത്ത് പ്രസിഡന്റ് പത്മിനിപങ്കജാക്ഷൻ ഏ​റ്റുവാങ്ങി.ഗ്രാമപഞ്ചായത്ത് സെക്രട്ടറി വി.ബാബു,സ്​റ്റാൻഡിങ് കമ്മി​റ്റി ചെയർമാൻമാരായ ജെ.ജഗദീഷ്,ആർ.ഗീതമ്മ,ബി.ചന്ദ്രിക തുടങ്ങിയവരും ക്ഷേത്രസമിതി സെക്രട്ടറി ഇൻ ചാർജ്ജ് പി.പി.നാരായണൻ കമ്മി​റ്റിയംഗങ്ങളായ വിവേക്.വി.പൊന്നപ്പൻ,ഗിരീഷ് എന്നിവരും പങ്കെടുത്തു.ആശുപത്രിക്കായി
തങ്കി പള്ളിയും സ്ഥലം നൽകാൻ സന്നദ്ധത അറിയിച്ച് ഗ്രാമപഞ്ചായത്തംഗത്തിന് കത്തുനൽകിയിരുന്നു.