കോഴിക്കുഞ്ഞുങ്ങൾക്ക് പൊള്ളുന്ന വില, കോഴിത്തീറ്റ കിട്ടാനില്ല

ആലപ്പുഴ: കോഴി​ത്തീറ്റ കി​ട്ടാതായതും കോഴി​ക്കുഞ്ഞുങ്ങൾക്ക് വി​ല കുത്തനെ ഉയർന്നതും സംസ്ഥാനത്തെ കോഴി​ കർഷകർക്ക് തി​രി​ച്ചടി​യാകുന്നു. അന്യസംസ്ഥാനങ്ങളി​ൽ നി​ന്ന് പേരി​ന് മാത്രമാണ് കോഴി​ത്തീറ്റ എത്തുന്നത്. കോഴി​ത്തീറ്റ എടുക്കാനായി​ പോകുന്ന വാഹനങ്ങൾ വെറുംകൈയോടെ മടങ്ങുന്നതി​നാൽ വാഹന വാടക ഇനത്തി​ലും നഷ്ടമുണ്ടാകുന്നു. അസംസ്കൃത വസ്തുക്കളുടെ ക്ഷാമമാണ് കോഴി​ത്തീറ്റ ക്ഷാമം രൂക്ഷമാക്കുന്നത്. ഇതോടെ തീറ്റയ്ക്ക് വി​ലയും വർദ്ധി​ച്ചു.

സേലം, ഈറോഡ്, ഭദ്രാവതി, ബംഗളൂരു എന്നിവിടങ്ങളിൽ നിന്നാണ് കേരളത്തിലേക്ക് കോഴിത്തീറ്റ എത്തിയിരുന്നത്. തായ്‌ലൻഡ്, നെതർലൻഡ് എന്നിവിടങ്ങളിൽ നിന്നാണ് തീറ്റയ്ക്ക് ആവശ്യമായ ചേരുവകൾ ഇന്ത്യൻ കമ്പനികൾ ഇറക്കുമതി ചെയ്യുന്നത്. വിദേശത്തുനിന്നുള്ള ഇറക്കുമതി നിലച്ചതോടെ തീറ്റ ഉത്പാദിപ്പിക്കുന്നതിനാവശ്യമായ ചേരുവകൾ കിട്ടാതായി.

'റോക്കറ്റേറി"​ കോഴി​ക്കുഞ്ഞുങ്ങൾ

ഒരു കോഴി​ക്കുഞ്ഞി​​ന്റെ വി​ല 22 രൂപയി​ൽ നിന്ന് 55 ലേക്കാണ് ഉയർന്നത്. കേരളത്തിൽ കോഴി ഉത്പാദനം കുറവായിരുന്നതിനാൽ അന്യസംസ്ഥാനങ്ങളിൽ നിന്നും അമിതവിലയ്ക്കാണിപ്പോൾ വ്യാപാരികൾ വാങ്ങുന്നത്. ഏകീകൃത നിരക്കിന് സർക്കാർ നടപടിയില്ലന്നാണ് വ്യാപാരികളുടെ പരാതി.

വൻകിട കുത്തകകളാണ് മാർക്കറ്റ് വി​ല തീരുമാനിക്കുന്നത്. കോഴിക്കുഞ്ഞിനെ പൂറത്തേക്ക് കൊടുക്കാതെ അവർ തന്നെ നേരിട്ട് വില്ക്കുകയും വീണ്ടും ഉത്പാദിപ്പിക്കുകയും ചെയ്യും. മറ്റ് സംസ്ഥാനങ്ങളിൽ പൗൾട്രി മേഖലയ്ക്ക് സഹായം നല്കുന്നുണ്ട്. കേരളത്തിലും സർക്കാർ നിയന്ത്രണവും പങ്കാളിത്തവും ആവശ്യമാണ്

- എസ്.കെ. നസീർ (ജനറൽ സെക്രട്ടറി, ഓള് കേരള പൗൾട്രി ഫെഡറേഷൻ)

കോഴിക്കുഞ്ഞുങ്ങളുടെ വില (ഒന്നിന് രൂപയിൽ)

സെപ്റ്റംബർ ഒന്ന് - 20

ഒക്ടോബർ ഒന്ന് - 44

ഒക്ടോബർ 5- 50

ഒക്ടോബർ 15 - 52

ഒക്ടോബർ19 - 53

ഒക്ടോബർ 20 - 48