ചേർത്തല:വാരനാട് വ്യാപാര സ്ഥാപനത്തിൽ വിദേശ കറൻസി മാറാനെന്ന വ്യാജേനയെത്തി പണം അപഹരിച്ച കേസിൽ 4 ഇറാൻ സ്വദേശികളെ കസ്​റ്റഡിയിൽ ലഭിക്കുന്നതിനുള്ള അപേക്ഷ ചേർത്തല പൊലീസ് നാളെ ചേർത്തല കോടതിയിൽ നൽകും. ചൊവ്വാഴ്ച്ചയോടെ പ്രതി​കളെ കസ്​റ്റഡി​യിൽ ലഭിക്കുമെന്നാണ് പൊലീസ് പ്രതീക്ഷിക്കുന്നത്.

മജീദ് സഹേബിയാസിസ് (32), ഇനോലാഹ് ഷറാഫി (30), ദാവൂദ് അബ്‌സലൻ (23), മോഹ്‌സെൻ സെതാരഹ് (35) എന്നിവരെയാണ് കഴിഞ്ഞ 12ന് ചേർത്തല പൊലീസ് അറസ്​റ്റു ചെയ്തത്.ഇവർ ജുഡീഷ്യൽ കസ്റ്റഡിയിൽ മാവേലിക്കര സബ് ജയിലിൽ കഴിയുകയാണ്.10ന് വൈകിട്ട് ചേർത്തല വാരനാട് ചെറുപുഷ്പം മെ​റ്റൽ ഏജൻസീസിലാണ് കേസിനാസ്പദമായ സംഭവം നടന്നത്. 34000 രൂപയാണ് വിദഗ്ദമായി ഇവർ തട്ടിയെടുത്തത്.

ചേർത്തല സ്റ്റേഷൻ ഹൗസ് ഓഫീസർ പി.ശ്രീകുമാർ, എസ്‌.ഐ ലൈസാദ് മുഹമ്മദ് എന്നിവരുടെ നേതൃത്വത്തിലുള്ള സംഘം പ്രതികളുടെ യാത്രാ വിവരങ്ങൾ, ഫോൺ വിളികൾ തുടങ്ങിയവ പരിശോധിക്കുകയാണ്.കസ്​റ്റഡിയിൽ ലഭിച്ച ശേഷം പ്രതികളുമായി സംസാരിക്കാനായി ഭാഷാ വിദഗ്ദന്റെ സഹായവും തേടുന്നുണ്ട്. കേരള സർവകലാശാലയിൽ നിന്നുള്ള ഉദ്യോഗസ്ഥരുടെ സഹായം ചോദിച്ചതായാണ് വിവരം.കേന്ദ്ര രഹസ്യാന്വേഷണ ഏജൻസികൾ പ്രതി​കളെ വീണ്ടും ചോദ്യം ചെയ്യാനും സാദ്ധ്യതയുണ്ട്.