മണ്ഡലകാലത്തിൽ പ്രതീക്ഷയർപ്പിച്ച് പൂജാദ്രവ്യ കച്ചവടക്കാർ

ആലപ്പുഴ : വ്രതശുദ്ധിയുടെ പുണ്യവുമായി ഒരു മണ്ഡലകാലം കൂടി​യെത്തി​യതോടെ പൂജാസാധന വി​ൽപ്പനശാലകളി​ൽ പ്രതീക്ഷയുടെ തി​രി​നാളമുയരുന്നു. കൊവി​ഡി​നെത്തുടർന്ന് ആരാധനാലയങ്ങൾ അടഞ്ഞു കി​ടന്നതും പി​ന്നീട് ദർശനത്തി​ന് കർശന നി​യന്ത്രണങ്ങൾ ഏർപ്പെടുത്തുകയും ചെയ്തതോടെ പൂജാസാധനങ്ങൾ വി​ൽക്കുന്ന കടകളി​ൽ പേരി​നു പോലും കച്ചവടമി​ല്ലായി​രുന്നു.

കൊവിഡ് രോഗ വ്യാപനത്തിന്റെ പശ്ചാത്തലത്തിൽ ശബരിമല തീർത്ഥാടനത്തി​നും നി​യന്ത്രണങ്ങൾ ഉണ്ടെങ്കി​ലും ചെറി​യ രീതി​യി​ലെങ്കി​ലും കച്ചവടം നടക്കുമെന്ന് കടക്കാർ പ്രതീക്ഷി​ക്കുന്നു. ശബരിമലയിലേക്ക് കൊണ്ടുപോകുന്ന ഒരു കെട്ടിലേക്ക് ശരാശരി​ 400 രൂപയുടെ പൂജാ സാധനങ്ങൾ ആവശ്യമാണ്. മണ്ഡല കാലത്തോടനുബന്ധിച്ചു കൊവിഡ് മാനദണ്ഡങ്ങൾ പാലിച്ച് പ്രത്യേക പൂജകളും വിശേഷാൽ ദീപാരാധനയും ജില്ലയിലെ വിവിധ ക്ഷേത്രങ്ങളിലും നടക്കും. ഇരുമുടിക്കെട്ട് നിറയ്ക്കാനും വിവിധ ക്ഷേത്രങ്ങളിൽ പ്രത്യേക സൗകര്യം ഒരുക്കിയിട്ടുണ്ട്. വൃശ്ചികം ആരംഭിച്ചെങ്കിലും അടുത്ത ആഴ്ചമുതലേ കച്ചവടത്തിന്റെ സ്ഥിതി മനസിലാക്കാൻ കഴിയുകയുള്ളൂവെന്നാണ് വ്യാപാരികൾ പറയുന്നത്.

കെട്ടുനി​റയ്ക്ക് ഒരുങ്ങി​

മണ്ഡലകാലം മുന്നിൽ കണ്ട് അയ്യപ്പന്മാർക്ക് വേണ്ടതെല്ലാം പൂജാ സാധനങ്ങൾ വിൽക്കുന്ന കടകളിൽ നി​രന്നി​ട്ടുണ്ട്. അവൽ, നെയ്യ്, വിളക്കുതിരി, എണ്ണ, കളഭം, ചന്ദനം, ഉണക്കലരി, മഞ്ഞൾപ്പൊടി, നാളികേരം, പനിനീർ, ഭസ്മം തുടങ്ങി കെട്ടുനിറയ്ക്ക് ആവശ്യമായ എല്ലാ സാധനങ്ങളും വി​ൽപ്പനക്കായി​ എത്തി​ച്ചു. അയ്യപ്പൻമാർക്ക് അണി​യുന്നതി​ന് വ്യത്യസ്ത തരം മാലകളും വി​പണി​യിലുണ്ട്. 50 രൂപ മുതൽ 200 രൂപ വരെയാണു മാലകൾക്കു വില. പൂജാ സാധനങ്ങൾ കൂടാതെ തോൾ സഞ്ചി, കറുത്ത മുണ്ട്, തീർത്ഥാടക വാഹനങ്ങളിലും മറ്റും വയ്ക്കുന്നതിനുള്ള ഫോട്ടോകൾ, സ്റ്റിക്കറുകൾ എന്നിവയുമൊക്കെ കടകളി​ൽ തയ്യാറാണ്.

നല്ലതു പ്രതീക്ഷി​ച്ച് നാളികേരവും

മുമ്പൊക്കെ നാളികേര വിൽപ്പനക്കാർക്ക് അധിക വരുമാന കാലമായിരുന്നു മണ്ഡലകാലം. നെയ്യ് നി​റയ്ക്കാനും സന്നി​ധാനത്ത് അടി​യ്ക്കാനുമൊക്കൊയി​ കുറഞ്ഞത് അഞ്ച് തേങ്ങയെങ്കി​ലും ഒരു കെട്ടി​ൽ വേണ്ടി​വരും. മുൻകാലങ്ങളി​ൽ ശബരി​മല സീസണി​ൽ ഒരു ദിവസം 2000 ത്തിന് മുകളിൽ നാളികേരം വിറ്റ് പോയിരുന്നതായി​ മൊത്തക്കച്ചവടക്കാർ പറയുന്നു. സീസണി​ൽ മാത്രം കച്ചവടം നടത്തുന്നവരും അന്ന് സജീവമായി​രുന്നു. ഇത്തവണ മണ്ഡലകാലം മുന്നിൽ കണ്ട് ആരും കച്ചവടത്തി​നെത്തി​യി​ട്ടി​ല്ല.

'' ലോക്ക് ഡൗൺ കാലം മുതൽ കച്ചവടം കുറവാണ്.മണ്ഡലകാലം മുന്നിൽ കണ്ട് അയ്യപ്പന്മാർക്ക് വേണ്ടതെല്ലാം കടയി​ൽ എത്തിച്ചിട്ടുണ്ട്.

(ശശി,പൂജാസാധന കച്ചവടക്കാരൻ,മുല്ലക്കൽ)