കുറുപ്പംപടി: മുടക്കുഴ പഞ്ചായത്തിലെ അഞ്ചാം വാർഡിൽ നിർമ്മാണം പൂർത്തികരിച്ച ബസ് കാത്തിരിപ്പ് കേന്ദ്രത്തിന്റെ ഉദ്‌ഘാടനം അഡ്വ. എൽദോസ് കുന്നപ്പിള്ളി എം.എൽ.എ നിർവഹിച്ചു. ഈ വർഷത്തെ എം.എൽ.എ ഫണ്ടിൽ നിന്നും 2.60 ലക്ഷം രൂപ അനുവദിച്ചാണ് നെടുങ്കണ്ണിയിൽ ബസ് കാത്തിരിപ്പ് കേന്ദ്രം നിർമ്മിച്ചത്.

നാല് മീറ്റർ നീളത്തിൽ 2 മീറ്റർ വീതിയിലുമാണ് ബസ് കാത്തിരിപ്പ് കേന്ദ്രം നിർമ്മിച്ചത്. കോൺക്രീറ്റ് രീതിയിൽ നിർമ്മിച്ചു എ.സി.പി ഷീറ്റുകൾ ഉപയോഗിച്ചു കേന്ദ്രം മനോഹരമാക്കി. നിലവിൽ ഇവിടെ ഉണ്ടായിരുന്ന കാലപ്പഴക്കം ചെന്ന കാത്തിരിപ്പ് കേന്ദ്രം പൊളിച്ചു നീക്കി. ഏത് നിമിഷവും നിലം പതിക്കാറായ അവസ്ഥയിലായിരുന്നു ഇത്. ഇതേ തുടർന്നാണ് പുതിയ ബസ് കാത്തിരിപ്പ് കേന്ദ്രം തുടങ്ങുന്നതിന് എം.എൽ.എ തുക അനുവദിച്ചത്.

വികസന കാര്യ സ്ഥിരം സമിതി അദ്ധ്യക്ഷ ഷോജ റോയി ചടങ്ങിൽ അദ്ധ്യക്ഷത വഹിച്ചു. പഞ്ചായത്ത് പ്രസിഡന്റ് ജിഷ സോജൻ, വൈസ് പ്രസിഡന്റ് എ.ടി അജിത് കുമാർ, ബ്ലോക്ക് പഞ്ചായത്ത് സ്ഥിരം സമിതി അദ്ധ്യക്ഷൻ ജോബി മാത്യു, പഞ്ചായത്ത് സ്ഥിരം സമിതി അദ്ധ്യക്ഷ എൽസി പൗലോസ്, പഞ്ചായത്ത് അംഗങ്ങളായ ഷൈമി വർഗീസ്, ലിസി മത്തായി, രാജു പി.കെ, മുടക്കുഴ സർവീസ് സഹകരണ ബാങ്ക് പ്രസിഡന്റ് പി.പി അവറാച്ചൻ, മുൻ പഞ്ചായത്തംഗം എൽദോ പാത്തിക്കൽ, ജോഷി തോമസ്, ബിജു പുതിയമഠം, രാജു പൊക്കത്തായിൽ, പി.പി ശിവരാജൻ, മത്തായി ജേക്കബ്ബ് എന്നിവർ സംസാരിച്ചു.