തൃക്കാക്കര : ജില്ലയിലെ 45 വയസിനു മുകളിൽ പ്രായമുള്ള റെവന്യൂ ജീവനക്കാർക്ക് കൊവിഡ് പ്രതിരോധത്തിന്റെ ഭാഗമായി പൾസ് ഓക്സിമീറ്ററും എൻ95 മാസ്കുകളും വിതരണം ചെയ്യുന്നതിന്റെ ഉദ്ഘാടനം റെവന്യൂ മന്ത്രി ഇ.ചന്ദ്രശേഖരൻ ഓൺലൈനായി നിർവഹിച്ചു. കൊവിഡ് മഹാമാരി കേരളത്തെയും ഇന്ത്യയെയും ലോകത്തെ തന്നെയും പ്രയാസകരമായ സാഹചര്യത്തിൽ എത്തിച്ചിരിക്കുകയാണ്. ഈ ഘട്ടത്തിൽ ആരോഗ്യ വകുപ്പിനും പൊലീസിനുമൊപ്പം മുന്നിട്ടിറങ്ങിയ റെവന്യൂ ഉദ്യോഗസ്ഥർക്കുള അംഗീകാരമാണ്. റെവന്യൂ ഉദ്യോഗസ്ഥരുടെ പ്രവർത്തനങ്ങൾ പ്രോത്സാഹിപ്പിക്കാൻ ജില്ലാ കളക്ടർ കാണിച്ച താത്പര്യം അഭിനന്ദനാർഹമാണെന്നും മന്ത്രി പറഞ്ഞു. ജില്ലാ കളക്ടർ എസ്. സുഹാസ് പൾസ് ഓക്സി മീറ്ററുകൾ വിതരണം ചെയ്തു.ജനങ്ങളുമായി അടുത്തിടപഴകി ജോലി ചെയ്യുന്ന ഉദ്യോഗസ്ഥർക്ക് മാനസിക സമ്മർദ്ദങ്ങൾ ഒഴിവാക്കി സുരക്ഷിത ബോധത്തോടെ ജോലി ചെയ്യാൻ പൾസ് ഓക്സി മീറ്ററുകളും എൻ 95 മാസ്കുകളും സഹായകമാവുമെന്നാണ് പ്രതീക്ഷിക്കുന്നത്. എ. ഡി. എം. സാബു കെ. ഐസക്, എച്ച്. എസ് ജോർജ് ജോസഫ് തുടങ്ങിയവർ ചടങ്ങിൽ പങ്കെടുത്തു.