കോലഞ്ചേരി: പ്രചരണത്തിനു സ്ഥാനാർത്ഥിക്കു മുന്നേ വീട്ടിലെത്തി നിരീക്ഷണത്തിനും സ്ക്വാഡ്. സ്ഥാനാർത്ഥിക്കൊപ്പം നാലുപേർക്കും വീടുകയറുന്നതിനു തടസമില്ല. പക്ഷേ, പ്രചാരണാവേശം വാനോളമുയരുമ്പോൾ കൊവിഡ് ബാധിതരുടെ വീടുകളിൽ അറിയാതെപോലും കയറരുതെന്നാണ് നിർദ്ദേശം. കയറിയാൽ ആരോഗ്യ പ്രവർത്തകർ പിടികൂടി ക്വാറന്റൈനിലാക്കും. പിന്നെ, ഏഴുദിവസം കഴിഞ്ഞ് കൊവിഡ് പരിശോധനാഫലം നെഗ​റ്റീവായാൽ മാത്രമെ പുറംലോകം കാണാനാവൂ. സ്ഥാനാർഥികളാണെന്നു കരുതി കൊവിഡ് മാനദണ്ഡങ്ങളിലോ ക്വാറന്റൈനിലോ ഒരിളവും ലഭിക്കില്ല. അതിനാൽ, നോക്കിയും കണ്ടുമൊക്കെ വോട്ടുപിടിക്കണമെന്നാണ് വിവിധ പാർട്ടി നേതൃത്വവും ആരോഗ്യവിദഗ്ദ്ധരും നൽകുന്ന മുന്നറിയിപ്പ്. സ്ഥാനാർത്ഥികളായി സീ​റ്റുറപ്പിച്ച പലരും ഓരോ വീട്ടിലുമുള്ള ആളുകളുടെ ആരോഗ്യസ്ഥിതി മനസ്സിലാക്കാൻ അനുയായികളെ ഏർപ്പാടാക്കിക്കഴിഞ്ഞു. ഏതെങ്കിലും വീട്ടിലുള്ളവർക്ക് കൊവിഡ് ബാധിച്ചെന്നറിഞ്ഞാൽ അപ്പപ്പോൾ റിപ്പോർട്ട് ലഭിക്കുന്ന തരത്തിലാണ് വാർഡുകളിൽ കാര്യങ്ങൾ നീങ്ങുന്നത്. കണ്ടെയ്ൻമെന്റ് സോണും സ്ഥാനാർത്ഥിയെ വട്ടംചു​റ്റിക്കും. പ്രത്യേകിച്ച് മ​റ്റു വാർഡുകളിൽ നിന്നു വന്ന് സ്ഥാനാർത്ഥികളാകുന്നവരെ. ഏതെങ്കിലുമൊരു വാർഡ് കണ്ടെയിൻമെന്റ് സോണാക്കിയാൽ അവിടേക്ക് പുറത്തുനിന്നുള്ളവർക്കു പ്രവേശനമില്ല. ഇതു സ്ഥാനാർത്ഥികൾക്കും ബാധകമാകും. ആഴ്ചകളോളം വാർഡ് കണ്ടയിൻമെന്റ് സോണായാൽ നേരിട്ടുള്ള ഒരു പ്രചരണവും നടക്കില്ല. ഈ സമയത്ത് ഡിജി​റ്റൽ പ്രചരണങ്ങൾ മാത്രമാണ് ആയുധം. ഇതിനായി വാട്‌സാപ്പ് കൂട്ടായ്മകളും ഓൺലൈൻ യോഗങ്ങളുമൊക്കെ സ്ഥാനാർത്ഥികൾ തീരുമാനിച്ചു കഴിഞ്ഞു. തിരഞ്ഞെടുപ്പ് പ്രഖ്യാപിച്ചതോടെ, പ്രചരണ സാമഗ്രികളും റെഡിയാണ്. ഹരിത ചട്ടം പാലിക്കേണ്ടതിനാൽ തുണി ഉല്പന്നങ്ങളാണ് അധികവും. പ്ളാസ്റ്റിക് ഫ്ളെക്സുകൾക്ക് പ്രവേശമില്ലാത്ത തിരഞ്ഞെടുപ്പ് കൂടിയാണിത്.