കൊച്ചി: ആലുവ സ്വദേശി പൃഥ്വിരാജ് എന്ന മൂന്ന് വയസുകാരൻ നാണയം വിഴുങ്ങിയതിനെത്തുടർന്ന് ചികിത്സ കിട്ടാതെ മരിച്ച സംഭവത്തിൽ വിശദമായ അന്വേഷണത്തിന് വിദഗ്ധ മെഡിക്കൽ പാനലിന് രൂപം നൽകണമെന്ന് സംസ്ഥാന മനുഷ്യാവകാശ കമ്മീഷൻ അദ്ധ്യക്ഷൻ ജസ്റ്റിസ് ആന്റണി ഡൊമിനിക് ആവശ്യപ്പെട്ടു.

സംഭവത്തിൽ ബിനാനി പുരം പൊലീസ് രജിസ്റ്റർ ചെയ്ത 711/20 ക്രൈം കേസിന്റെ അന്വേഷണം എത്രയും വേഗം പൂർത്തിയാക്കണമെന്നും കമ്മീഷൻ ജില്ലാ റൂറൽ പൊലീസ് മേധാവിക്ക് നിർദ്ദേശം നൽകി.

വിദഗ്ധ മെഡിക്കൽ പാനൽ രൂപീകരിച്ചാൽ മാത്രമേ മരണത്തിന്റെ യഥാർത്ഥ കാരണം അറിയാൻ കഴിയുകയുള്ളുവെന്ന് റൂറൽ പൊലീസ് മേധാവി കമ്മീഷനെ അറിയിച്ചിരുന്നു. ഇതനുസരിച്ചാണ് അടിയന്തിരമായി വിദഗ്ധ സമിതി രൂപീകരിക്കണമെന്ന് എറണാകുളം ഡി എം ഒ യോട് കമ്മീഷൻ നിർദ്ദേശിച്ചത്. കുട്ടിയെ ചികിത്സിച്ച ആലപ്പുഴ മെഡിക്കൽ കോളേജ് ആശുപത്രി. എറണാകുളം ജനറൽ ആശുപത്രി, ആലുവ ജില്ലാ ആശുപത്രി സൂപ്രണ്ടുമാർ തങ്ങൾക്ക് ചികിത്സാ പിഴവ് സംഭവിച്ചിട്ടില്ലെന്ന് കമ്മീഷനെ അറിയിച്ചു.